Elimizdegi úzdik perzenthanalar men balalar aýrýhanasy anyqtaldy
ASTANA. KAZINFORM – Beıbitshilik jáne kelisim saraıynda Medıtsına qyzmetkeri kúnine arnalǵan saltanatty is-shara sheńberinde ana men bala densaýlyǵyn saqtaý salasyndaǵy elimizdiń úzdik medıtsınalyq uıymdary jarııalandy. Medıtsınalyq kómektiń joǵary sapa standarttaryn kórsetip, zamanaýı tehnologııalardy engizip, analar men balalardyń qaýipsizdigin qamtamasyz etip otyrǵan jetekshi perınataldyq ortalyqtar men balalar aýrýhanalary qurmetti marapatqa ıe boldy.
Ana men bala densaýlyǵyn saqtaý densaýlyq saqtaý salasyndaǵy memlekettik saıasattyń negizgi basymdyqtarynyń biri bolyp qala beredi. Sondyqtan kásibı konkýrs sheńberinde áıelder men balalardyń densaýlyǵyn saqtaýǵa eleýli úles qosyp júrgen medıtsınalyq uıymdarǵa erekshe nazar aýdaryldy.
Densaýlyq saqtaý mınıstrligi málimetinshe, konkýrs qorytyndysy boıynsha «Bedeldi perzenthana» ataǵy elimizdiń úsh medıtsınalyq uıymyna berildi.
Jeńimpazdardyń qatarynda Astana qalasy ákimdiginiń №2 kópbeıindi qalalyq aýrýhanasy bar. Uıym atynan Ǵalym Ámirjanuly tanystyrdy. Medıtsınalyq uıym elordadaǵy bosandyrý qyzmetin kórsetetin iri ortalyqtardyń biri bolyp sanalady jáne júkti áıelder men jańa týǵan nárestelerge joǵary tehnologııalyq medıtsınalyq kómek kórsetedi.
Sondaı-aq Túrkistan oblysynyń №1 oblystyq perınataldyq ortalyǵy joǵary marapatqa ıe boldy. Ortalyqtyń atynan Saltanat Ýsadýllaqyzy qatysty. Mekeme óńirdiń túkpir-túkpirinen kelgen júkti áıelder men jańa týǵan nárestelerge, onyń ishinde kúrdeli klınıkalyq jaǵdaılarda mamandandyrylǵan kómek kórsetedi.
Qyzylorda oblysynyń Oblystyq perınataldyq ortalyǵy da qurmetti ataqqa ıe boldy. Uıymnyń atynan Jańyl Isaqyzy tanystyrdy. Medıtsınalyq uıym júktilikti qadaǵalap-qaraýdyń, bosandyrýdyń jáne jańa týǵan nárestelerdi kútýdiń zamanaýı ádisterin belsendi túrde engizip keledi.
«Bedeldi balalar aýrýhanasy» nomınatsııasynyń jeńimpazdary retinde elimizdiń úsh jetekshi balalar medıtsınalyq uıymy tanyldy.
Olardyń qatarynda Túrkistan oblysynyń Qalalyq balalar aýrýhanasy bar. Uıym atynan Almat Meıirbekuly Baısalov qatysty. Mekeme balalarǵa mamandandyrylǵan medıtsınalyq kómek kórsetip, óńirdegi iri pedıatrııalyq ortalyqtardyń biri bolyp sanalady.
Kásibı qaýymdastyq Almaty qalasyndaǵy №2 qalalyq balalar klınıkalyq aýrýhanasy qyzmetine de joǵary baǵa berdi. Dırektory Marat Rabandııaruly basqaratyn aýrýhana elimizdegi jetekshi balalar statsıonarlarynyń biri sanalady jáne kishkentaı patsıentterge medıtsınalyq kómektiń keń aýqymyn usynady.
Jeńimpazdardyń qataryna Astana qalasy ákimdiginiń №3 kópbeıindi qalalyq balalar aýrýhanasy da endi. Medıtsınalyq uıymdy dırektor Marat Abdýov basqarady. Aýrýhana elordanyń balalar densaýlyǵyn saqtaý salasyndaǵy negizgi ortalyqtarynyń biri jáne dıagnostıka, emdeý men ońaltýdyń zamanaýı ádisterin engizip jatyr.
– Ana men bala densaýlyǵyn saqtaý salasyndaǵy joǵary nátıjelerdiń negizinde medıtsına qyzmetkerleriniń kásibı biliktiligi, zamanaýı tehnologııalar jáne densaýlyq saqtaý júıesin úzdiksiz jetildirý jatyr. Búgin biz bolashaq urpaqtyń densaýlyǵyna kún saıyn qamqorlyq jasap júrgen ujymdardyń eńbegin atap ótemiz, – dedi Densaýlyq saqtaý mınıstri Aqmaral Álnazarova.
Densaýlyq saqtaý mınıstrliginde bosandyrý qyzmeti men balalar densaýlyǵyn saqtaý júıesin damytý memlekettik saıasattyń mańyzdy baǵyttarynyń biri bolyp qala beretinin atap ótti. Salany júıeli jańǵyrtýdyń arqasynda elimizde ana men bala densaýlyǵy kórsetkishteri jaqsaryp, medıtsınalyq uıymdar halyqaralyq ozyq standarttardy tájirıbege engizýdi jalǵastyryp jatyr.
Marapattaý rásimi Medıtsına qyzmetkeri kúnine arnalǵan aýqymdy merekelik is-sharalardyń bir bóligine aınalyp, elimizdiń barlyq óńirinen kelgen medıtsına qaýymdastyǵy ókilderiniń basyn qosty.
Prezıdent bir top medıtsına qyzmetkerine memlekettik nagradalar tapsyrǵanyn jazǵan edik.
