Elimizdegi úsh munaı óńdeý zaýytynda benzın men dızeldiń 1,2 mln tonna qory bar
ATYRAÝ. KAZINFORM – Elimizde munaı óńdeıtin úsh zaýyt bar. Naýryz aıynda zaýyttarda benzın men dızeldiń 1,2 mln tonna qory jınaqtalǵan.
«QazMunaıGaz» UK AQ baspasóz qyzmetiniń málimetinshe, naýryz aıynda úsh munaı óńdeý zaýyty toqtaýsyz jumys istegen. Sonyń nátıjesinde elimizde benzın men dızel otynynyń rekordtyq qory jınaqtalǵan.
«Dızel otyny men benzın qory eldiń 1,5 aılyq tutyný kólemine teń, bul – shamamen 1,2 mln tonna. Qazir 670 myń tonna dızel otyny, 530 myń tonna benzın qory bar», -dep habarlady kompanııanyń baspasóz qyzmeti.
Elimizdegi munaı óńdeý zaýyttary keńeıtilgen jóndeýaralyq kezeńine kóshirý josparlanyp otyr. Belgili bolǵandaı, «QazMunaıGazǵa» qarasty munaı óńdeý zaýyttary keńeıtilgen jóndeýaralyq kezeńge daıyndalyp jatyr.
«Zaýyttar josparly aldyn alý jumystaryna jyl saıyn emes, birneshe jylda bir ret toqtaıtyn bolady. Álemdik munaı óńdeý salasy sońǵy onjyldyqta keńeıtilgen jóndeýaralyq kezeńge birtindep kóship jatyr. Óıtkeni óndiriske jańa tehnologııalar engizilýde. Bul tehnologııalar jabdyqtyń tozý deńgeıin baqylaýǵa jáne profılaktıkalyq dıagnostıka arqyly problemalyq ýchaskelerdi anyqtaýǵa múmkindik beredi. Alaıda, kúni-túni jumys istep turǵan jabdyqtyń jóndeý jumystaryn keıinge qaldyrýǵa nemese múldem júrgizbeı qoıýǵa bolmaıtynyn eskergen jón. Úsh jyldyq kezeńde barlyq qondyrǵy úzdiksiz jumys isteýi úshin tıisti jaǵdaı jasalýy tıis», -dep málim etti kompanııanyń baspasóz qyzmeti.
Eske sala ketelik, budan buryn «QazMunaıGaz» basqarma tóraǵasynyń orynbasary Atyraý jáne Pavlodar munaı óńdeý zaýyttary jekeshelendirilmeıtinin aıtqan edi.
