Elimizdegi ulttyq parkterge 2,8 mıllıonnan astam adam barǵan

ASTANA. KAZINFORM — Byltyr Qazaqstandaǵy ulttyq parkterge 2,8 mıllıonnan astam adam barǵan. 2023 jylǵy derekpen salystyrǵanda 18%-ǵa kóp.

Týrızm jáne sport mınıstrliginiń málimetinshe, týrıster arasynda Іle-Alataý ulttyq parki, Sharyn shatqaly, Altyn-Emel jáne Kólsaı kólderi erekshe tanymal. Memleket basshysynyń ishki týrızmdi damytý jónindegi tapsyrmalaryna sáıkes, Týrızm jáne sport mınıstrligi jańa ekotýrıstik baǵyttardy damytý boıynsha júıeli jumys júrgizip jatyr.

Qazirgi ýaqytta shamamen 750 shaqyrym tabıǵı marshrýt abattandyrylǵan. Aldaǵy jyldary maýsymdyq erekshelikter, basym baǵyttar jáne kólik qoljetimdiligi eskerile otyryp, taǵy 350 shaqyrym joldy jabdyqtaý josparlanyp otyr. Bıyl toǵyz negizgi týrıstik soqpaq salý kózdelgen.

Іri jobalardyń biri — Alatau Amanaty baǵyty. Ol «Aıýsaı» vızıt-ortalyǵynyń negizinde júzege asyrylyp jatyr. Bul joba Іle Alataýynyń kórkem jotalarymen ótip, Sharyn shatqalyn «Tańbaly» qoryq-mýzeıimen baılanystyratyn 1200 shaqyrymnan astam joldy qamtıdy. Marshrýt boıynda etnoaýyldar, kempıngter, glempıngter men gastrotýrızm nysandary salynady. Bolashaqta bul baǵyt ishki jáne halyqaralyq oqıǵaly týrızm úshin tutas ekojúıege aınalmaq. Alatau Amanaty jobasy salany damytýmen qatar, aýyl turǵyndaryn ekonomıkalyq belsendilikke tartýǵa da baǵyttalǵan.

Bastama KazAlpineClub qoǵamdyq birlestigine tıesili jáne ony AMANAT partııasy, Týrızm jáne sport mınıstrligi, Kazakh Tourism ulttyq kompanııasy, sondaı-aq Almaty qalasy men Almaty oblysynyń ákimdikteri qoldap otyr.

Búginde marshrýttyń negizgi aıaldamalary týrıster úshin tartymdy núktelerge aınalyp otyr. Olardyń qatarynda: «Esik» memlekettik tarıhı-mádenı qoryq-mýzeıi, Kók-Jaılaý shatqaly, Býtakovka saıy, Alma-Arasan ystyq bulaqtary, Úlken Almaty kóli, VIII–XIII ǵasyrlardaǵy Talhız qalashyǵy jáne Oi-Qaragai taý kýrorty bar.

Jobanyń iske qosylý kúni qatysýshylar «Taza Qazaqstan» jalpyulttyq aktsııasy aıasynda taýly aımaqtarda tazalyq jumystaryn júrgizip, ekologııalyq is-shara ótkizdi.

Mundaı jobalardy júzege asyrý tek turaqty týrızmdi damytýǵa ǵana emes, sonymen qatar jańa jumys oryndaryn ashýǵa jáne jergilikti qaýymdastyqtardy qoldaý arqyly óńirler úshin jańa ekonomıkalyq múmkindikter beredi.

Buǵan deıin Іle-Alataýy ulttyq parkinde baqylaý júıesi avtomattandyrylǵanyn jazǵanbyz.