1 qańtardan bastap Býrabaı ulttyq parkine kirý tarıfi ózgeredi
Buǵan deıin habarlanǵandaı, Qazaqstan Respýblıkasynyń 2022 jylǵy 21 jeltoqsandaǵy (№165-VII) Zańy aıasynda Salyq kodeksiniń 591-babyna Memlekettik ulttyq park aýmaǵy kólik quraldaryn kirgizgeni úshin alym alý máselesi boıynsha tolyqtyrý engizilgen bolatyn. Osyǵan oraı, 2024 jyldyń 1 qańtarynan bastap elimizdegi erekshe qorǵalatyn tabıǵı aýmaqtarǵa kirýge jańa tólem stavkalary bekitildi, dep habarlaıdy Kazinform.
2024 jylǵa arnalǵan alym mólsheri:
- jaıaý júrginshi – 0,1 AEK (369 teńge);
- mototsıkl, moped, kvadrotsıkl úshin – 0,2 AEK (738 teńge);
- jeńil avtokólik – 0,3 AEK (1 108 teńge);
- syıymdylyǵy 16 orynǵa deıingi shaǵyn avtobýs pen júk kóligi – 1 AEK (3 692 teńge);
- 32 orynǵa deıingi avtobýstar – 2 AEK (7 384 teńge);
- 32-den astam oryndyq avtobýs – 3 AEK (11 076 teńge).
Erekshe qorǵalatyn tabıǵı aýmaqtarda ornalasqan eldi mekenderde turatyn jáne/nemese sol jerde ornalasqan saıajaılary bar jeke tulǵalar tólemnen bosatylady.
Býrabaı, Bulandy jáne Eńbekshilder aýdandarynyń ulttyq park aýmaǵynan tys ornalasqan eldi mekenderiniń halqy jalpy negizde aqy tóleýge mindetti. Bul ulttyq parkpen irgeles jerlerde turatyndarǵa da qatysty.
2024 jyldyń 1 qańtarynan bastap jeke/zańdy tulǵalardyń avtokólik quraldarynan ulttyq park aýmaǵynda bolǵan árbir kún úshin tólem alynady.
Erekshe qorǵalatyn tabıǵı aýmaqtardy paıdalanǵany alymnyń ashyqtyǵyn qamtamasyz etip, sybaılas jemqorlyq qaýpin azaıtý úshin «Býrabaı» memlekettik ulttyq parkinde 5 baqylaý-ótkizý beketi avtomattandyryldy.
Ótkizý beketteriniń bári ekinshi deńgeıli bankterdiń tólem qyzmetine qosylǵan (kaspi.kz, homebank, Jusan), ıaǵnı tólemdi termınal arqyly da, banktik aýdarymmen de jasaýǵa bolady.
Onlaın tóleý úshin bankterdiń QR-kodtary qoıylǵan. Bank qosymshasymen tóleý úshin shotyńyzdy aldyn ala toltyrýǵa bolady (aqyly joldardaǵy sııaqty). Ondaı kezde ulttyq parkten shyqqanda tólem avtomatty túrde esepshotyńyzdan alynady. Tólem banktik aýdarymmen de, qolma-qol da jasalady.
Baqylaý-ótkizý beketinde keptelis bolmaýy úshin marshrýtty aldyn ala josparlap, Býrabaı aýylyndaǵy ǵana emes, basqa da ótkizý beketterinen de shyǵýǵa bolatynyn eskerýlerińizdi suraımyz.
Anyqtama aqparat:
№1 ótkizý beketi – Astana-Petropavl tas joly jaǵynan kirý.
№2 ótkizý beketi – Býrabaı aýylynda.
№3 ótkizý beketi - Şýchınsk qalasy arqyly Şýchınsk-Býrabaı kýrorttyq aımaǵyna kirer tusta.
№4 ótkizý beketi – Memlekettik ulttyq park aýmaǵyna Şýchınsk qalasynan «Baldáýren» oqý-saýyqtyrý ortalyǵy baǵytyndaǵy kire beriste.
№5 ótkizý beketi – Qatarkól kóliniń janyndaǵy Prıozernyı orman sharýashylyǵynyń aýmaǵynda.
Tarıf «Erekshe qorǵalatyn tabıǵı aýmaqtar týraly» QR Zańynyń 38-babyna oraı ózgerdi. Kólik quraldary adamdarǵa qaraǵanda qorshaǵan ortaǵa kóbirek zııan keltiretini (aýany lastaıdy, zııandy hımııalyq zattar taralady, dybysy qatty) eskerildi.
Erekshe qorǵalatyn tabıǵı aýmaqtardaǵy tólem respýblıkalyq bıýdjetke túsedi, «Býrabaı» MUTP-nyń mindetine ony tek jınaý kiredi.
Buǵan deıin Qazaqstandaǵy ulttyq parkter aýmaǵyna kirýdiń jańa tarıfi jarııalanǵanyn jazǵan bolatynbyz. Mınıstrlik mamandarynyń paıymynsha, bul normalar adamdardyń jaıaý týrızmge nazar aýdarýyn yntalandyrýǵa yqpal etedi.
