Elimizdegi taǵy bir iri kompanııa munaı óndirý kólemin azaıtty

Elimizdiń batysynda munaı óndiretin kompanııalar ótken táýlikte munaı óndirý kólemin taǵy azaıtty. Buryn eki kompanııa «qara altyn» kólemin tómendetken edi. Endi onyń qataryna taǵy bir kompanııa qosyldy, dep habarlaıdy Kazinform. 

ENERGO_OFFICIAL Telegram arnasynyń málimetine qaraǵanda, ótken táýlikte elimizdegi úshinshi iri kompanııa – KPO munaı óndirý kólemin azaıtýǵa sheshim qabyldaǵan. Munyń aldynda «Teńizshevroıl» men NCOC kompanııalary osyndaı qadamǵa barǵan edi. Buǵan Kaspıı qubyr jelisi konsortsıýmynyń Qara teńiz jaǵalaýyndaǵy aýa raıynyń qolaısyzdyǵynan tankerlerge munaı tıeýdi toqtatqany sebep bolyp otyr.

«TShO men NKOK-tan keıin taǵy bir iri qazaqstandyq kompanııa – KPO Kaspıı Qubyr konsortsıýmynyń (KQK) Novorossıısk portyndaǵy aýa raıyna baılanysty tankerlerge munaı quıýdy toqtata turýyna baılanysty munaı óndirýdi azaıtty. Máselen, 29 qarashada KPO boıynsha táýliktik óndiristiń tómendeýi 34%, 36-dan 23,8 myń tonnaǵa deıin bolǵan. TShO-da munaı óndirý 67%-ǵa (83,4-ten 27,2 myń tonnaǵa deıin), NCOC-ta 65%-ǵa (54-ten 18,6 myń tonnaǵa deıin) tómendedi», - dep habarlady ENERGO_OFFICIAL.

Eske sala ketelik, budan buryn Qazaqstandaǵy taǵy bir kompanııa munaı óndirý kólemin azaıtqanyn habarlaǵan bolatynbyz.

Sondaı-aq Qazaqstannyń munaı-gaz kompanııalary ótken táýlikte qansha munaı óndirgenin jazǵan edik.