Elimizdegi sý resýrstary boıynsha aqparattyq júıe ázirlenedi
ASTANA. KAZINFORM — Jyl sońyna deıin elimizde sý resýrstary boıynsha aqparattyq júıe ázirlenedi.
Bul týraly QR Sý resýrstary jáne ırrıgatsııa mınıstrliginiń baspasóz qyzmeti habarlady.
Vedomstvo málimetinshe, bul júıege Qazaqstan aýmaǵynda 17 736 ózen men 2 949 shaǵyn kól, Kaspıı jáne Aral teńizderiniń shekarasy, 8 sý sharýashylyǵy basseıni men 77 sý sharýashylyǵy ýchaskesi, 377 magıstraldy kanal, 56 toǵan, 297 sý qoımasy jáne 548 bóget tsıfrlandyrylyp, engiziletin bolady.
— Júıeni engizý sý resýrstaryn esepke alý jáne basqarý úshin biryńǵaı tsıfrlyq platforma qurýǵa, olardy paıdalanýdyń ashyqtyǵy men tıimdiligin arttyrýǵa, sondaı-aq tótenshe jaǵdaıdyń aldyn alý úshin neǵurlym sapaly taldaý men boljam jasaýǵa múmkindik beredi. Búgingi tańda sýdy esepke alý jáne sý resýrstarynyń aǵymdaǵy jaı-kúıin jedel monıtorıng jasaý úshin modýlderdi ázirleý aıaqtalýda. Bul jumys aıaqtalǵannan keıin júıeni synaqtan ótkizý jáne paıdalanýshylardy oqytý josparlanýda, — dedi Sý resýrstary jáne ırrıgatsııa vıtse-mınıstri Aslan Abdraımov.
Atalǵan jumysqa Sý resýrstary jáne ırrıgatsııa mınıstrliginiń vedomstvolyq baǵynysty uıymy — Sý resýrstarynyń aqparattyq-taldaý ortalyǵy da tartylyp otyr. Mekeme sý sharýashylyǵy salasyndaǵy barlyq derekterdi jınaý jáne óńdeý, qysqa jáne uzaq merzimdi boljam, modeldeý jáne basqa da jumystarmen aınalysatyn bolady.
Ázirlenip jatqan aqparattyq júıe sý sharýashylyǵyn basqarýdy jańǵyrtýǵa, sý resýrstaryn paıdalaný tıimdiligin arttyrýǵa jáne boljam jasaýǵa múmkindik beredi, sondaı-aq olardyń aǵymdaǵy jaı-kúıine monıtorıng júrgizedi.
Júıeniń negizgi mindeti — sý resýrstaryn paıdalaný men qorǵaýǵa baılanysty sheshimder qabyldaý kezinde ashyqtyqty, avtomattandyrý jáne taldaýdy qamtamasyz etý.
Osyǵan deıin Kaspııdiń taıazdanýyn tejeý úshin qandaı jumystar júrgizilip jatqanyn jazǵan edik.