Elimizdegi sý qoımalary tasqynǵa tótep berip jatyr ma
ASTANA. KAZINFORM – Sý resýrstary jáne ırrıgatsııa mınıstrliginiń resmı ókili Móldir Abdýalıeva el aýmaǵyndaǵy sý qoımalarynyń qazirgi jaǵdaıymen tanystyrdy.
Qostanaı oblysy
Qostanaı oblysynyń Qaratomar sý qoımasynan sekýndyna 3250 tekshe metr sý jiberilip, 99% toldy. Sý qoımasy tranzıttik rejımde jumys istep jatyr, sý jiberý kólemi ulǵaıýy múmkin. Qostanaı oblysynda sý tasqyny jalǵasyp jatyr. Qazirgi ýaqytta mınıstrlik pen ákimdik qyzmetkerleri sý jiberý boıynsha birlesip jumys istep jatyr.
Soltústik Qazaqstan oblysy
Soltústik Qazaqstan oblysynda Sergeev sý qoımasynan sekýndyna 3820 tekshe metr sý jiberiledi. Petropavl sý qoımasynan sekýndyna 73 tekshe metr sý jiberilip jatyr, eki sý qoımasy da 100% toldy. Oblysta sý tasqyny jalǵasyp jatyr. Qazir bul óńirde Sý resýrstary jáne ırrıgatsııa mınıstri Nurjan Nurjigitov sý ótkizýdi retteý jumysyn jeke qadaǵalap júr.
Aqmola oblysy
Astana sý qoımasy tranzıttik rejımge kóshti. Qazir sekýndyna 400 tekshe metr sý jiberilip jatyr jáne sol kólemde taǵy sý kelip jatyr. Aqmola oblysynyń Seletın sý qoımasynan sekýndyna 150 tekshe metr sý jiberiledi, qazir sý qoımasy 99,4% toldy.
Batys Qazaqstan oblysy
Óńirde áli kúnge deıin Shaǵan ózeni deńgeıiniń kóterilýi baıqalady, munda sekýndyna 680 tekshe metr sý jiberilip jatyr, Derkól ózeni boıynsha sý deńgeıi tómendedi. Jaıyq ózeninde sý tasqynynyń ekinshi tolqyny bolýy múmkin.
Sý resýrstary jáne ırrıgatsııa mınıstri Nurjan Nurjigitovtiń reseılik áriptesterimen almasyp jatqan derekterine súıensek, búginde Irıklın sý torabynan sekýndyna 1680 tekshe metr sý jiberiledi. Eń joǵarǵy qarqyn 4 sáýirde bolǵan, sekýndyna 2600 tekshe metr.
Sý resýrstary jáne ırrıgatsııa mınıstrliginiń qyzmetkerleri Batys Qazaqstan jáne Atyraý oblystary ákimdikteriniń mamandarymen birge Jaıyq ózeniniń arnasyn tazartý jáne sý basýdy azaıtý úshin keptelistiń aldyn alý boıynsha jumys júrgizip jatyr.
Aqtóbe oblysy
Qazirgi ýaqytta Aqtóbe oblysynyń sý qoımasynda jaǵdaı turaqty. Nysan 97% toldy, sekýndyna 50 tekshe metr sý jiberilip jatyr. Qarǵaly sý qoımasy tranzıttik rejımde jumys istep tur. Sý qabyldaý jáne ótkizý kólemi sekýndyna 350 tekshe metr.
Shyǵys Qazaqstan oblysy
Kelesi aptanyń basynda Shyǵys Qazaqstan oblysynyń sý qoımalarynda sý tasqyny beleń alady dep boljanyp otyr. Buqtyrma sý qoımasyna kútiletin ortasha aǵyn 1780-2720 mln tekshe metr, Shúlbi sý qoımasyna – 2380-3730 mln tekshe metr.
Sonymen qatar Ertis ózeni boıynsha sý aǵyny bolýy múmkin. Sondyqtan Abaı, Shyǵys Qazaqstan jáne Pavlodar oblystarynda ákimdikter men Sý resýrstary jáne ırrıgatsııa mınıstrliginiń qyzmetkerleri sý ótkizý jáne turǵyndardyń qaýipsizdigin qamtamasyz etý boıynsha qajetti is-sharalardy atqaryp jatyr.
Qaraǵandy oblysy
Qaraǵandy oblysynyń sý qoımalarynda sý tasqynynyń sharyqtaý kezeńi ótti, sý qoımalary tranzıttik rejımge kóshti. Sý qoımalary arqyly ózenderdiń aǵynyn retteý nátıjesinde Qaraǵandy oblysyndaǵy sý qoımalarynan tómen ornalasqan eldi mekenderdi sý basý qaýpi barynsha azaıdy.
«Búgingi tańda negizgi kúsh ózenderdiń aǵynyn retteý jáne tasqyn sýyn ótkizý úshin barlyq gıdrotehnıkalyq qurylystar men sý qoımalarynyń qaýipsiz jumysyn qamtamasyz etýge baǵyttalǵan. Barlyq sý sharýashylyǵy nysandarynda táýlik boıy kezekshilik uıymdastyrylyp, sý sharýashylyǵy jaǵdaıyna saǵat saıyn monıtorıng júrgizilip jatyr. Sondaı-aq sý qoımalarynan sý jiberý jónindegi sońǵy málimetter ákimdikter jáne jedel shtabqa saǵat saıyn jiberilip jatyr», - dep tolyqtyrdy atalǵan vedomstvonyń resmı ókili M.Abdýalıeva.
