Elimizdegi sý qoımalary kelesi maýsymǵa qanshalyqty daıyn
ASTANA. KAZINFORM – Qazaqstannyń ońtústik oblystarynyń sý qoımalary 55 %-ǵa toly. Bul ótken jylǵy sáıkes kezeńmen salystyrǵanda 23%-ǵa artyq. Búgingi tańda ońtústiktegi sý qoımalary kelesi jylǵy sýarý maýsymyna sý jınaý rejıminde jumys istep jatyr. Bul týraly Sý resýrstary jáne ırrıgatsııa mınıstrliginiń baspasóz qyzmeti málim etti.
Al, soltústik, batys jáne shyǵys oblystardyń qoımalarynan sý jiberilýde. Bul kóktemgi sý tasqyny kezinde erigen qar sýyn qabyldaý úshin bos syıymdylyqtardy qamtamasyz etý úshin jasalady.
Búgingi tańda soltústiktegi sý qoımalary 79%-ǵa toly. Batys oblystar boıynsha sý qoımalarynyń ortasha sý jınaý kólemi 44%. Shyǵystaǵy sý qoımalary 89%-ǵa toly bolsa, Ortalyq Qazaqstandaǵy sý qoımalarynda 85% sý bar.
«Búgingi tańda barlyq sý qoımalary bekitilgen kestege saı jumys istep jatyr. Alaıda, jumys kestesi sý tasqynyna qatysty boljamdarǵa baılanysty túzetiletin bolady. Sý tasqyny kezeńine daıyndyq aıasynda mınıstrlik barlyq oblystarǵa sý basý qaýpin azaıtý jónindegi is-sharalardyń tıimdiligin arttyratyn jersnarıadtar sekildi mamandandyrylǵan tehnıkany paıdalana otyryp, ózen arnalaryn tazartý jóninde usynys jiberdi», - dedi Sý resýrstary jáne ırrıgatsııa mınıstrliginiń resmı ókili Móldir Ábdýalıeva.
Sý resýrstary men sýarý salasynda qandaı nátıjelerge qol jetkizilgeni týraly saraptama maqaladan oqı alasyz.
