Elimizdegi sý qoryn qorǵaý salasyndaǵy qolda bar úzdik tehnologııalar tizimi jasaldy
ASTANA. KAZINFORM — Sý resýrstary jáne ırrıgatsııa mınıstrliginde Ǵylymı-tehnıkalyq keńes otyrysy ótti. Oǵan vedomstvo basshysy Nurjan Nurjigitov qatysty. Kún tártibinde 2025 jylǵa arnalǵan keńes jumysynyń qorytyndysy qaraldy.
Byltyr ǵylymı keńestiń jeti otyrysy ótti. Onda eldiń sý qaýipsizdigin qamtamasyz etý, ǵylymı áleýetti damytý jáne sý sharýashylyǵy salasyna zamanaýı tehnologııalardy engizý jóninde shamamen jıyrma negizgi másele qaraldy.
Atap aıtqanda, sý qoryn qorǵaý jáne paıdalaný salasynda qolda bar úzdik tehnologııalar tizimin jasaý, sondaı-aq gıdrotehnıkalyq melıoratsııa, sý sharýashylyǵy nysandaryn salý jáne paıdalaný salasynda kásibı standarttardy ázirleý máselelerine erekshe nazar aýdaryldy.
Otyrys qorytyndysy boıynsha Ǵylymı-tehnıkalyq keńes Sý resýrstary jáne ırrıgatsııa mınıstrligi ázirlegen qolda bar úzdik tehnologııalardyń negizdemelik tizimin maquldap, ony vedomstvonyń ınternet-resýrsynda jarııalaýdy usyndy. Sondaı-aq sarapshylar tizimdi merzimdi túrde jańartý qajettigin atap ótti.
Mınıstrlik qolda bar úzdik tehnologııalardyń tizimin jasaǵanda, ásirese ekonomıkanyń sýdy kóp qajet etetin salalaryna jáne bedeldi ǵylymı-zertteý ınstıtýttary men halyqaralyq uıymdardyń ǵylymı negizdemesine mán berdi. Tizim strategııalyq jáne kontseptýaldyq qujattardyń maqsattary men ındıkatorlaryna sáıkes daıyndaldy. Mysaly, Qazaqstan Respýblıkasynyń «Jasyl ekonomıkaǵa» kóshý tujyrymdamasy, Qazaqstan Respýblıkasynyń Sý resýrstaryn basqarý júıesin damytý tujyrymdamasy, Sý jáne Ekologııalyq kodekster jáne t.b.
Otyrysta qatysýshylar ınnovatsııalyq jáne sý únemdeý tehnologııalaryn engizý, sý resýrstaryn basqarý tıimdiligin arttyrý jáne salanyń kadrlyq áleýetin nyǵaıtý usynystaryn da talqylady.
«Qazaqstannyń sý sharýashylyǵy salasyn damytý jáne alǵa qoıylǵan mindetterdi sheshý úshin ǵalymdardyń eńbegi óte mańyzdy. Mınıstrlik júzege asyratyn árbir jobanyń ǵylymı negizdemesi bolýy tıis. Qolda bar úzdik tehnologııalar tizimi sý resýrstaryn tıimdi paıdalaný úshin eń nátıjeli ádisterdi anyqtaýǵa múmkindik beredi», - dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, Altaıdaǵy sý qubyry jobasyna qosymsha qarjy qajet.