Elimizdegi shıpajaılar emdeý-saýyqtyrý sharalaryna qazaqy emdi de qosty
ASTANA. KAZINFORM – Prezıdent is Basqarmasy Medıtsınalyq ortalyǵynyń «Oqjetpes» brendine kiretin shıpjaılar jelisi bıyldan bastap emdeý-saýyqtyrý sharalaryna qazaqy emdi de qosty.
Keshende qazirgi zamanǵy emdeý-dıagnostıkalyq bazamen tolyqtyrylǵan tabıǵı biregeı faktorlar: qaraǵaı ormanynyń ekologııalyq taza aýasy, Balpash sor kóliniń emdik balshyǵy jáne Maı Balyq kóliniń mıneraldy sýy, radondy terapııa, «Qulager — Arasan» mıneraldy sýy júrek-tamyr júıesi, tynys alý músheleri, tirek-qımyl apparaty, asqorytý, qan aınalymy jáne júıke júıesi aýrýlaryn, ýrologııalyq jáne gınekologııalyq aýrýlardy emdeýge jáne ońaltýǵa múmkindik beredi.
Sondaı-aq, kelýshiler arasynda buǵy múıizinen alynatyn panta terapııasyna suranys joǵary. Jalpy álemde buǵynyń múıizi men qany emdik maqsatta keńinen qoldanylady. Sol pantoterapııanyń arqasynda ımmýnıtet jaqsaryp, deneniń ártúrli ınfektsııalarǵa tózimdiligi artady.
Munda qazaq mádenıetin, dástúrlerin qyzmetke, tamaq mázirine, bólmelerdi naqyshtaýǵa paıdalanǵan. Kól jaǵasynda, orman ishimen serýendeıtin jaıaý júrginshiler súrleýi bar. Sol jolmen júrgen demalýshylar 100 metr saıyn ornatylǵan ár taqtaıshalardan «Qozy Kórpesh-Baıan sulý» lıro-epostyq jyrynyń úzindilerin oqyp nemese aýdıo nusqasyn da tyńdaı alady. Sondaı-aq, tamaq mázirine de qymyz, baýyrsaq, jent sekildi densaýlyqqa paıdaly ulttyq taǵamdar qosylǵan.
Sonymen birge kelýshiler kıiz úıdiń shıpaly aýasymen tynystap, tátti, syrly saryndy qazaq kúılerin tyńdap sanasyn sergitip, rahattanyp demalady. Budan bólek arnaıy daıyndalǵan alańda sadaq atyp, qazaqtyń jaýyngerlik rýhyn sezinip, serpilip, sergıdi.
Osylardyń barlyǵy em alýshylardyń, ásirese sheteldik qonaqtardyń erekshe yqylasyn oıatyp, qyzǵýshylyǵyn týdyrdy. Osylaısha alys-jaqynan kelgen qonaqtarǵa halqymyzdyń salt-dástúrin, bolmysyn nasıhattaı otyryp, densaýlyǵynyń da ońalýyna kómektesedi.
Aıta keteıik, «Oqjetpes» emdeý-saýyqtyrý keshenine biriktirilgen shıpaıjaılarda bıylǵy jeti aıda 15 myńnan astam adam saýyǵyp qaıtty.
