Elimizdegi shetel ýnıversıtetin támamdaǵan túlekter Qazaqstanda jumys isteýge mindetteledi
ASTANA. KAZINFORM – Elimizdegi sheteldik ýnıversıtetterdiń fılıaldarynda bilim alǵan otandyq jáne sheteldik stýdentterdiń bilim alýǵa qatysty quqyǵy men mindetteri teń.
Bul týraly Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Janna Esinbaeva málim etti.
«Elimizde fılıaldary ashylyp jatqan sheteldik ýnıversıtetter álemniń úzdik 500 ýnıversıteti reıtıngisine, keıbiri TOP-100 tizimine kiredi. Sondyqtan fılıaldar joǵary oqý oryndaryn saralaýdyń ulttyq júıesine kirmeıdi. Jalpy qazaqstandyq JOO-da bolsyn, sheteldik ýnıversıtetterdiń fılıaldarynda bolsyn, stýdentter úshin bilim alý teń quqyqtar men mindetterdi kózdeıdi. Grant ıelengen stýdentter oqýyn aıaqtaǵan soń belgili bir merzim Qazaqstanda (memlekettik kásiporyndarda nemese jeke sektorda) jumys isteý talaby qoıylady», - deıdi Janna Esinbaeva agenttik joldaǵan saýalǵa jaýap bere otyryp.
Onyń aıtýynsha, aqyly negizde oqyǵan túlekterge elimizde belgili bir merzimde jumys isteý mindeti júktelmeıdi. Mınıstrliktiń málimetine súıensek, memlekettik bilim berý tapsyrysy josparyna sáıkes 2024-2025 oqý jylyna sheteldik ýnıversıtetter fılıaldarynda bilim alatyn stýdentterge jalpy sany 1635 memlekettik grant bólindi.
2025-2026 oqý jylyna – 1585, 2026-2027 oqý jylyna – 1335 grant bólý josparlanyp otyr.
Buǵan deıin elimizde ashylyp jatqan shetel ýnıversıteti fılıaldarynda «Qazaq tili» jáne «Qazaqstan tarıhy» pánin oqytý mindetteletini týraly habarlaǵan edik.
