Elimizdegi sanatorııalyq-kýrorttyq uıymdardyń 41,4 paıyzynda qyzmet kórsetý sapasy tómen
ASTANA. KAZINFORM – Sońǵy jyldary ishki jáne sheteldik týrıster arasynda saýyqtyrý týrızmi damyp kele jatyr degendi jıi estımiz. Bul qanshalyqty ras? Saýaldarymyzǵa QR Týrızm jáne sport vıtse-mınıstri Erjan Erkinbaev jaýap berdi.
Saýyqtyrý týrızmi – kelýshilerge demalýǵa ǵana múmkindik bermeı, sonymen qatar olardyń densaýlyǵy men ómirdegi tepe-teńdigin jaqsartýǵa jol ashpaq.
«Qazaqstanda saýyqtyrý týrızmine, ásirese, pandemııadan keıingi kezeńde suranys artty. Elimizde týrısterdiń fızıkalyq jáne psıhıkalyq densaýlyǵyn jaqsartý úshin biregeı tabıǵı resýrstar men joǵary sapaly qyzmetterdi usynýǵa múmkindik mol. 2020 arnaıy jol kartasy sheńberinde elimizdegi sanatorııalyq-kýrorttyq uıymdardy egjeı-tegjeıli túgendeý júrgizildi. Zertteý 145 nysannyń 30-ynyń ǵana belsendiligin shartty túrde joǵary deńgeıge jatqyzýǵa bolatynyn kórsetti. Bul - zerttelgen obektilerdiń jalpy sanynyń 23,4% quraıdy. Uıymdardyń 35,2%-y orta deńgeı sanatyna, al 41,4%-y qyzmet kórsetý sapasynyń tómen deńgeıi sanatyna jatqyzyldy», - deıdi vıtse-mınıstr.
Zertteý nátıjeleri kýrorttyq týrızm salasyndaǵy bilikti mamandardyń jetispeýshiligi jáne marketıngtik múmkindikterdiń shekteýliligi sııaqty problemalardy anyqtaǵan.
«Máselelerdi sheshý úshin sala qyzmetkerlerin oqytýdy engizý jáne quzyrettiligin damytý jumystary belsendi júrgizilip jatyr. Marketıng, satý jáne týroperatorlarmen qarym-qatynas, ásirese toptyq brondaý daǵdylaryn jetildirý úshin arnaıy oqytý baǵdarlamalary uıymdastyryldy. Bul - qyzmetkerlerdiń kásibı deńgeıin arttyrýǵa jáne kórsetiletin qyzmetterdiń sapasyn arttyrýǵa múmkindik berdi. Óz kezeginde týrısterdi kóbirek tartýǵa jáne saýyqtyrý týrızmi úshin tartymdy baǵyt retinde Qazaqstannyń pozıtsııasyn nyǵaıtýǵa kómektesedi. Qazaqstanda saýyqtyrý týrızminiń damýy bizdiń turǵyndardyń densaýlyǵyn jaqsartýǵa kómektesip qana qoımaı, sonymen qatar el ekonomıkasyn jańa deńgeıge kóterip, álemdik týrıstik naryqtyń mańyzdy qatysýshysy retindegi ımıdjimizdi nyǵaıtatynyn atap ótken jón», - deıdi Erjan Erkinbaev.
Belgili bolǵandaı, búginde týrısterdi kóbine Býrabaıdaǵy demalys oryndary qyzyqtyrady eken. Almatyda jáne Almaty oblysynda mıneraldy sýlar men zamanaýı SPA-protsedýralardy qosa alǵanda, qyzmetterdiń keń spektrin usynatyn sanatorııler men SPA ortalyqtary da suranysqa ıe. Elimizdiń shyǵysynda, Altaı taýlarynda ıoga, medıtatsııa jáne ashyq aýada serýendeýge múmkindikter bar. Astanadan 110 shaqyrym jerde, Aqkól qalasyna jaqyn jerde ornalasqan Wyndham Residence Aqkol Club saıajaı qonaq úıiniń jobasy erekshe nazar aýdarýǵa turarlyq. Bul qonaqúı Qazaqstanda birinshi bolyp týrızm ındýstrııasyn nyǵaıtyp, Qazaqstandy salaýatty demalý men saýyqtyrý úshin odan da tartymdy orynǵa aınaldyratyn saýyqtyrý kontseptsııasyn usynatynyn atap ótken jón.
