Temir joldardy jóndeý jumystary 96% aıaqtaldy – Kólik mınıstrligi

ASTANA. KAZINFORM – Osy maýsymda temir jol kóligimen tasymaldaý sapasyn arttyrý úshin 1400 shaqyrymǵa jýyq temir jol jóndeýden ótti.Búgingi tańda 1352 shaqyrym jol jóndelip, 96% jumys aıaqtaldy. Bul týraly Kólik mınıstrliginiń temirjol jáne sý kóligi komıteti habarlady.

Máselen, elimizdiń barlyq óńirlerin qamtıtyn jumystardyń basym bóligi myna ýchaskelerde jasaldy:

Aqtoǵaı-Semeı-Altaı (153 sh/q);
Shý-Qandyaǵash (266 sh/q);
Qandyaǵash-Aqsaraı (138 sh/q);
Astana-Almaty (260 sh/q);
Almaty-Pavlodar (106 sh/q);
Jańa-Esil-Kókshetaý 161 shaqyrym jáne t.b.

Jalpy, temir joldardyń 569 shaqyrymy kúrdeli jóndeýden, 181 shaqyrymy keshendi jóndeýden jáne 602 shaqyrymy josparly - aldyn ala jóndeýden ótti. Eldiń soltústiginde maýsym aıaqtaldy, ońtústik óńirlerdiń jumysy áli de júrgizilýde.

«2025 jyly taǵy 1480 shaqyrym temirjoldy jóndeý josparlanýda»,-delingen habarlamada.

Osyǵan deıin halyqaralyq jáne respýblıkalyq mańyzy bar joldarǵa «KAZ» jáne «KZ» geokodtary berilgeni týraly jazdyq.