Elimizdegi poıyzdarda qashan sapaly ınternet qosylady
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Rostıslav Konıashkın avtojol men temirjol boıynda ınternet sapasyn jaqsartý máselesine túsinik berdi.
Onyń aıtýynsha, byltyr mınıstrlik respýblıkalyq mańyzy bar avtojoldarda ınternet jelisi nashar qamtylǵan aýmaqtarǵa qatysty tıisti taldaý jasady.
- Taldaý negizinde biz antennalyq tirek qurylystaryn qosymsha ornatý qajet 243 núkteni anyqtadyq. Qazir ákimdikter jobalyq-smetalyq qujattamany ázirlep jatyr. Qazirdiń ózinde 80-ge jýyǵy ornatyldy. 2025 jyly respýblıkalyq mańyzy bar joldarda ınternet jelisi jaqsarady. Sonymen qatar, jergilikti mańyzy bar joldarǵa da taldaý bastaldy, onyń qorytyndysy boıynsha is-sharalar jospary qurylady, - dedi R. Konıashkın Parlament Májilisinde kólik-logıstıkalyq áleýetin damytý taqyrybyna arnalǵan Úkimet saǵatynda.
Budan bólek vıtse-mınıstr poıyzdarǵa ınternet tartýǵa qatysty túrli tehnologııa zerttelgenin aıtty.
- Eń durys nusqa – ol tómen orbıtalyq spýtnıkter arqyly ınternetpen qamtamasyz etý. Qazir OneWeb-pen kelissóz júrip jatyr. Qańtar aıynda QTJ-men birlesip pılottyq jobany iske qosýdy josparlap otyrmyz. Onyń nátıjeleri boıynsha usynylatyn sapa men tarıfter qanshalyqty tıimdi bolatynyn pysyqtap, sheshim qabyldaımyz, - dedi Rostıslav Konıashkın.
Eske salsaq, elimizde eki myńǵa jýyq mektep Starlink ınternetine qosyldy.