Elimizdegi otbasyn qoldaý ortalyqtary nege zárý
ASTANA. KAZINFORM – Bul týraly búgin Astanada QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń otyrysyna aıtyldy.
Jıynǵa QR Premer-mınıstriniń orynbasary – Mádenıet jáne aqparat mınıstri, Ulttyq komıssııa tóraǵasy Aıda Balaeva tóraǵalyq etken bolatyn. Otyrys barysynda óńirlerdegi Otbasyn qoldaý ortalyqtarynyń qyzmet tıimdiligin arttyrý máseleleri qaraldy. Atalǵan taqyryp boıynsha Qazaqstan Respýblıkasyndaǵy Otbasy isteri jónindegi ýákil, Ulttyq komıssııa tóraǵasynyń orynbasary Snejanna Imasheva baıandama jasady.
Onyń aıtýynsha, qazirgi ýaqytta Otbasyn qoldaý ortalyqtarynyń jumysy negizinen shuǵyl jaǵdaılarǵa jedel áreket etýge jáne azamattardyń ótinishi boıynsha qyzmet kórsetýge baǵyttalǵan.
Sonymen qatar ortalyqtar jumysynyń tıimdiligi kadrlyq quramǵa jáne materıaldyq-tehnıkalyq jaraqtandyrý deńgeıine tikeleı baılanysty ekeni atap ótildi. Búginde ortalyqtarda psıhologtar, áleýmettik qyzmetkerler men zańgerlerdi qosa alǵanda, bilikti mamandar tapshylyǵy baıqalady.
Jalaqy deńgeıiniń tómendigi de ortalyqtardyń kadrlyq áleýetin damytýǵa kedergi keltiretin negizgi faktorlardyń biri retinde kórsetildi.
Qazirgi ýaqytta respýblıka boıynsha 158 Otbasyn qoldaý ortalyǵy jumys isteıdi. 11 óńirde bul ortalyqtar barlyq qala men aýdandy tolyq qamtyp, halyq úshin qyzmetterdiń 100 paıyz qoljetimdiligin qamtamasyz etip otyr.
Sonymen qatar Almaty, Astana jáne Shymkent qalalarynda biryńǵaı qalalyq Otbasyn qoldaý ortalyqtary qurylǵan. Jyl basynan beri respýblıka boıynsha azamattardan 30 myńǵa jýyq ótinish tirkelgen. 24 myńnan astam otbasy konsýltatsııalyq kómek alsa, taǵy 5 myńǵa jýyq otbasyna turaqty áleýmettik qoldaý kórsetilip keledi.
-Otbasy – qoǵamnyń tiregi. Otbasynyń amandyǵy men berekesi memlekettiń turaqtylyǵyna tikeleı áser etedi. Bul máselede ekinshi kezektegi taqyryp nemese usaq-túıek degen bolmaıdy. Áleýmettik máselelerdi, otbasyǵa qatysty túıtkilderdi sheshý týraly aıtqanda, biz jekelegen baǵyttardy emes, keshendi jumysty nazarǵa alýymyz kerek. Sondyqtan Otbasyn qoldaý ortalyqtarynyń qyzmeti júıeli ári naqty qajettilikke baǵdarlanǵan bolýy tıis. Bizdiń jumysymyzdyń nátıjesi – jaı ǵana statıstıka emes. Árbir kórsetkishtiń artynda naqty adam taǵdyry, naqty otbasynyń ómiri tur, – dedi Úkimet basshysynyń orynbasary.
Jıyn qorytyndysy boıynsha Aıda Balaeva ár óńir boıynsha problemalyq máselelerge analıtıkalyq derekter, áleýmettik zertteýler men monıtorıng nátıjeleri negizinde egjeı-tegjeıli taldaý júrgizýdi tapsyrdy. Ulttyq komıssııaǵa óńirlik erekshelikterdi eskere otyryp, Otbasyn qoldaý ortalyqtarynyń qyzmetin jetildirýge baǵyttalǵan naqty usynymdar ázirleý mindeti júkteldi.
Premer-mınıstrdiń orynbasary aldaǵy jumystyń naqty algorıtmderin aıqyndaý, sondaı-aq mamandardyń eńbekaqysy men olardy qosymsha yntalandyrý máseleleri boıynsha naqty usynystar engizý qajettigin atap ótti.
Sondaı-aq, halyqtyń Otbasyn qoldaý ortalyqtarynyń qyzmeti týraly habardarlyǵyn arttyrýǵa, otbasylarmen ataýly jumys júrgizý tájirıbesin keńeıtýge jáne vedomstvoaralyq ózara is-qımyl tetikterin jetildirýge erekshe nazar aýdaryldy.
Osyǵan deıin «Ata-ana akademııasynyń» alǵashqy nátıjesi týraly jazdyq.
