Elimizdegi oqyrmany eń kóp 100 kitap anyqtalatyn boldy
ASTANA. KAZINFORM — Elimizde qazaqstandyq eń úzdik 100 kitapty anyqtaıtyn ulttyq saýalnama bastaldy.
— Ulttyq quryltaıǵa múshe depýtattar jańa bastama kóterip jatyr. Bul bastamanyń maqsaty — óz avtorlarymyzdyń eńbekterin nasıhattaý. Kóptegen elderde osyndaı tamasha dástúr bar. Ulybrıtanııa, Frantsııa elderinde osyndaı saýalnamanyń nátıjesinde úzdik dep tanylǵan 200, 100 shyǵarmanyń tizimin jarııalap jatady. Biz de sol dástúrge saı óz elimizde osyndaı jalpyulttyq saýalnama bastaıyq dep sheshtik, — dedi QR Memlekettik keńesshisi Erlan Qarın bastamanyń ashylýynda.
Onyń aıtýynsha, bul bastamanyń maqsaty tek úzdik 100 shyǵarmanyń tizimin jasaý emes, oqyrmandar arasynda eńbekterdi talqylaý dástúrin qalyptastyrý.
Málimetke saı, saýalnama eGov portaly arqyly júrgiziletin bolady. Onda arnaıy anketa daıyndalǵan. Elimizdiń kez kelgen azamaty eGov mobile qosymshasy arqyly óziniń 10 súıikti kitabyn usyna alady.
Bul kitaptar ártúrli janrda bolýy múmkin, ıaǵnı tarıhı shyǵarmalar, kórkem ádebıet, balalar ádebıeti jáne fantastıka janryndaǵy týyndylar ene alady.
— Saýalnama 3 aı boıy júrgiziledi. Onyń nátıjesin tamyz aıynda Abaı kúnine oraı jarııalaıtyn bolamyz. Bul saýalnama nátıjesi árbir qazaqtyń kitap sóresinde turatyn kitaptardyń tizimin anyqtap qana qoımaı, baspa isine de jańa úrdis bere me dep oılaımyz, — dedi Erlan Qarın.
Aıta keteıik, Meloman kitap dúkeni jelisi saýalnamaǵa qatysýshylarǵa arnaıy júlde daıyndap otyr. Onyń ishinde eń jas qatysýshyǵa, otbasy músheleriniń bári daýys bergen januıaǵa jáne eń belsendi aımaqtarǵa arnaıy syılyqtar bar.
Eske salaıyq, Qyzylorda oblysynyń polıtsııa bóliminde alǵashqy kitaphana ashyldy.