Elimizdegi memqyzmetshilerdiń 68 paıyzy — úıli-barandy

ASTANA. KAZINFORM — 23 maýsym — Qazaqstanda memlekettik qyzmetshiler kúni. Osy oraıda Qoǵamdyq saıasat ınstıtýtynyń sholýyn oqyrman nazaryna usynamyz.

Bıyl 1 qańtardaǵy málimetke sáıkes, elimizde 83 myń memlekettik qyzmetshi bar. Olardyń orta jasy — 39-40 aralyǵy, al jumys ótili — 10-12 jyl. 

Memlekettik qyzmettegi áıelderdiń úlesi 55,5%, onyń ishinde 39,2% basshylyq laýazymda.  

Alaıda, jastardyń úlesi azaıǵan, ıaǵnı 2018 jyly 24,6% bolsa, 2022 jyly 17,8%-ǵa deıin tómendep otyr. 

Sondaı-aq, memlekettik qyzmetke irikteýdiń ashyqtyǵyn arttyrý úshin eqyzmet.gov.kz ınternet-portaly pılottyq rejımde iske qosyldy.

Jańa jobanyń basty ereksheligi — konkýrsqa irikteýdiń barlyq kezeńinde onlaın formatta qatysýǵa bolady.

Atalǵan jobaǵa 2023 jylǵy 1 naýryzdan beri 6 memlekettik organ engizilse, al bıyl 1 shildede olardyń sany 22-ge jetpek. 

Memlekettik qyzmet isteri agenttiginiń derekteri boıynsha, ótken jyldyń 9 aıynda 11 296 úmitker konkýrs boıynsha memlekettik qyzmetke taǵaıyndaldy. 

Búginde Úkimet ákimshilik reformany jalǵastyryp jatyr: 

— 496 fýnktsııa ortalyqtandyrylmaǵan, 
— memlekettik apparat jumysyn bıýrokratııalandyrý sheńberinde zańdardan 364 fýnktsııa alynyp tastaldy.

Elimizdegi memlekettik basqarý júıesiniń basty jetistikteriniń biri — memlekettik qyzmetterdi tsıfrlandyrý. 

Memlekettik tizilimge 1 353 qyzmet kiredi, onyń 92% elektrondy túrde qoljetimdi.

Ótken jyly 274 mln-nan astam memlekettik qyzmet kórsetildi, onyń 93% elektrondy túrde usynylǵan. 

Sondaı-aq, 62 myń adamnyń arasynda júrgizilgen qoǵamdyq monıtorıng derekteri boıynsha respondentterdiń 81,3% memlekettik qyzmet kórsetý sapasyna qanaǵattanarlyq baǵa berip otyr.

Bul — sońǵy 9 jyldaǵy eń joǵary kórsetkish. 

Osy oraıda 87 derekqordy biriktiretin jáne onymen jumys isteý úshin kóptegen quraldy usynatyn Smart Data Ukimet (SDU) júıesine erekshe nazar aýdarýǵa bolady. 

2023 jyly SDU júıesi bedeldi «Future of Government Awards 2023», «Open Source Adaption» nomınatsııasynda TOP-3-ke kirdi. 

Aıta ketsek, álemniń 50 elinen 300 jobanyń ishinde SDU jobasy BUU Damý baǵdarlamasymen (BUU DB), «Public digital» jáne «AWS» ınstıtýtymen erekshelendi jáne basqa elderde paıdalanýǵa usynyldy. 

Future of Government Awards tsıfrlyq sheshimder men tehnologııalar arqyly adam ómirin ózgertetin iskerlerdi, komandalardy jáne kóshbasshylardy atap otyr. 

Taǵy bir joba — «Otbasynyń tsıfrlyq kartasy», ol 1300 ótinimniń ishinen «Inklıýzıvti tsıfrlyq transformatsııa» sanatynda úzdik dep tanyldy. 

Osylaısha Qoǵamdyq saıasat ınstıtýty saýalnamaǵa qatysqan respondentterdiń negizinde memlekettik qyzmetshiniń otbasylyq portretin jasady. 

Derekterge sáıkes, memlekettik qyzmetshilerdiń 68% nekede.

Onyń ishinde:

42% — 35 jasqa deıingi jastar; 
30,5% — orta jastaǵy adamdar (36-45 jas);
27,3% — egde jasta (46-63 jas).

Otbasyly memlekettik qyzmetshilerdiń 64%-dan astamynyń balasy bar, al onyń ishinde 14% — kópbalaly ata-ana.