Elimizdegi mektepter men kolledjderde quqyqtyq mádenıet sabaǵy bastaldy
ASTANA.KAZINFORM - Búginnen bastap elimizdiń barlyq óńirinde 1000-ǵa jýyq mektep pen kolledjde «Zań jáne tártip» jobasy aıasynda quqyqtyq mádenıet sabaǵy bastaldy.
Jobany aýqymdy túrde engizý týraly sheshim Almaty oblysynyń Talǵar aýdanynda júrgizilgen pılottyq kezeńniń qorytyndysy negizinde qabyldandy. Onda oqýshylar arasynda býllıng pen quqyq buzýshylyqtardyń tómendegeni tirkeldi.
Joba eń keń qamtylǵan óńirler qatarynda Shymkent qalasy - 100-ge jýyq berý uıymy, Qaraǵandy oblysy - 190-nan astam, Pavlodar oblysy - shamamen 110 uıymdy qamtıdy. Oqýshylarmen jumysqa quqyq qorǵaý organdarynda qyzmet etken tájirıbesi bar 600-den astam tálimger tartylǵan. Sabaqtar eki aptada keminde bir ret ótkiziledi.
Pılottyq kezeń Talǵar aýdanyndaǵy 10 mektep pen 3 kolledjde ótkizilip, 9 myńnan astam oqýshyny qamtydy. Monıtorıng nátıjeleri boıynsha býllıng pen kıberbýllıng jaǵdaılary 18%-ǵa tómendegeni, minez-qulyq táýekeli tómen oqýshylar úlesiniń 31,9%-ǵa artqany, sondaı-aq basa nazar aýdarýdy qajet etetin jasóspirimder sanynyń 30%-ǵa azaıǵany anyqtaldy.
Joba oqýshylardyń quqyqtyq mádenıetin qalyptastyrýǵa jáne quqyq buzýshylyqtardyń aldyn alýǵa baǵyttalǵan.
Oqý-aǵartý mınıstrligi málimetinshe, «Qazaqstan balalary» tujyrymdamasy aıasynda «Zań jáne tártip» jobasy respýblıka boıynsha kezeń-kezeńimen engiziletin bolady. Bul quqyq buzýshylyqtardyń aldyn alý men balalarǵa qatysty zorlyq-zombylyqtyń aldyn alýdyń biryńǵaı tásilderin qalyptastyrýǵa múmkindik beredi.
Joba bilim alýshylardyń zańǵa baǵyný mádenıetin jáne jaýapkershilik daǵdylaryn damytýǵa yqpal etedi.
Buǵan deıin Almaty oblysynda mektep oqýshylaryna quqyqtyq mádenıet oqytylatynyn jazǵan edik.
