Elimizdegi qoqys polıgondarynyń 20,6% ǵana ruqsat qujaty bar

ASTANA. KAZINFORM — Qazaqstanda qoqys polıgondarynyń kóbi tolyp qalǵan, olardy qalpyna keltirý qajet. Bul máseleni Ekologııa jáne tabıǵı resýrstar mınıstri Erlan Nysanbaev kóterdi.

— Ótken jyldyń qorytyndysy boıynsha 2 973 qoqys polıgony bar, onyń 608-niń talapqa sáıkes ruqsat qujaty bar, bul bar-joǵy 20,6%. Polıgondardyń kóbi tolyp qalǵan, olardy qalpyna keltirý qajet. Mysaly, Atyraý, Túrkistan, Batys jáne Soltústik Qazaqstan oblysy men Shymkent qalasy polıgondary 90% asa tolǵan, Astana qalasynda 98%-ǵa tolǵan, al Jezqazǵan qalasynda shamadan tys tolyp ketken, — dedi Erlan Nysanbaev Úkimet otyrysynda.

Osy oraıda mınıstr 2023 jyly Úkimet keshendi is-sharalar josparyn bekitkenin aıtty. 

— Josparǵa saı 100 jańa polıgon salý kózdelgen. Búginde ákimdikter tek 7-in salyp, iske qosty. 23 polıgonnyń qujaty daıyn, 18 polıgon boıynsha qujat ázirlenip jatyr, — deıdi vedomstvo basshysy.

Aıta keteıik, búgin Úkimet otyrysynda Oljas Bektenov halyqtyń ekologııalyq mádenıetin arttyrý boıynsha naqty usynystar ázirleýdi júktedi. 

Sondaı-aq Premer-mınıstr qoqys tastaıtyn adamdarǵa jazany qatańdatýdy tapsyrdy.