Elimizdegi qysqy demalys oryndarynyń qyzmet aqysy qansha
2025-2026 jyldarǵa arnalǵan qysqy týrızmde tańdaý kóp. Taý shańǵysy kesheni, tabıǵat aıasynda serýen, syrǵanaq pen shana jolaǵy. Elden shyqpaı-aq demalysty sátti ótkizýge bolady. Qonaqúıde turý, syrǵanaý jáne ózge de qysqy demalys túrleriniń baǵasy týraly Kazinform agenttiginiń tilshisi zerdeledi.
Qysta barar jer kóp. Qaltańyzǵa qaraı ondaǵan demalys ornynyń birin tańdaýǵa bolady. Búginde demalys oryndarynda shańǵy alańy, muz aıdyny, túrli shanamen syrǵanaý oryndary, jaıaý júrginshi joly men balyq aýlaý orny bar. Shanaǵa ıt jegýge de bolady.
Almaty: taý men demalys aımaǵy
Almaty qalasynan 25 shaqyrym qashyqtyqta Shymbulaq ornalasqan. Áıgili tań shańǵysy kýrortynda 2 260 metrden 3 200 metrge deıingi bıiktikke kóterilýge bolady. Munda 10 kótergish jáne 25 shaqyrymdyq shańǵy jolaǵy bar. Demalys orny tańerteń erte ashady.
Tańerteń saǵat 08:30-ben túski 13:30 aralyǵynda eresekterge — 9 000 teńge, al 6-14 jas aralyǵyndaǵy balalarǵa — 3 000 teńge.
Tústen keıingi saǵat 12:30 – 18:00 aralyǵynda eresekterge — 9 000 teńge, al 6-14 jas aralyǵyndaǵy balalarǵa — 4 000 teńge.
Shymbulaqta bir kún boıy júrseńiz eresekterge 12 000 teńge, al balalarǵa 6 000 teńge tóleýińiz kerek.
Shańǵy jolaǵyna shyǵýdy endi ǵana úırenetin adamdarǵa arnalǵan tarıf — 8000 teńge. Ol oqý-jattyǵýǵa arnalǵan jolaqta júredi jáne kóterilý qyzmetin qoldanady.
Shymbulaqta eresekterge arnalǵan kıim jıyntyǵy 8-10 myń teńge bolyp tur. Oǵan shańǵy nemese snoýbrod jáne aıaq kıim kiredi. Al shańǵyny ǵana jalǵa alsa 6-8 myń teńge tóleıdi. Sonymen birge aıaq kıim, dýlyǵa, kózildirik pen taıaǵyna 2-5 myń teńge qajet.
Eger taýda túneıtin bolsa, ekonom nómirlerine 18-45 myń teńge, al komfort sanatyna 120 000 teńge jáne odan joǵary aqy tóleıdi. Munda ashyq avtoturaqtarǵa 500 teńge, al jabyǵyna 1 000 teńge (ekeýiniń de tarıfi eki saǵatqa esepteledi) suraıdy.
Oi-Qaragai — Almatydan 40 shaqyrym qashyqtyqtaǵy demalys orny. Otbasylyq demalys orny 1 500 metr bıiktikte ornalasqan.
Eresekterge tańǵy abonement baǵasy — 14 000 tenge, balalarǵa — 5 500 teńge.
Tústen keıin – 16 500 jáne 5500 teńge.
Túski ýaqytta – 19 000 jáne 6500 teńge.
Túngi saǵat 19:00 – 23:00 aralyǵynda eresekterge 14 500 teńge jáne balalarǵa 5 500 teńge tóleýińiz kerek.
Sonymen birge bir kúnge arnalǵan demalys tarıfi bar. Saǵat 9:00 - 23:00 aralyǵynda eresekterge – 22 000 teńge. Tórt saǵattyq oqý-jattyǵý baǵasy – 10 000 teńge.
Qysqy demalys ornynyń biri – Medeý. Muz aıdyny 1 691 metr bıiktikte ornalasqan. Mundaǵy muz aıdynynyń aýdany – 10 500 sharshy metr. Syrǵanaý ýaqyty — 9:00 – 00:00 aralyǵy.
Tańǵy syrǵanaý (2,5 saǵat) baǵasy oqýshylarǵa 500 teńge, 14-22 jas aralyǵyndaǵy jasóspirimder men jastarǵa 600 teńge jáne eresekterge 1 000 teńgeden ekenin aıta keteıik.
Kúndizgi tarıf – 500, 1 200 jáne 2 000 teńge.
Keshke – 500 teńge, 1500 teńge jáne 2500 teńge.
Shyǵys Qazaqstan: Altaıdyń baýraıy men jolaǵy
Ósmekennen 25 shaqyrym qashyqtyqta 600-1 200 metr bıiktikte «Altaı Alpisi» ornalasqan. Munda onnan astam syrǵanaý jolaǵy bar. Eger bir kúndi az dep sanasańyz, qona jatyp eki adamǵa arnalǵan jartylaı lıýks nómirin 52 000 teńgege jalǵa alýǵa bolady. Munda tańǵy jáne túski as ta kiredi. Lıýks nómirleri — 98 000 teńge, bes adamǵa yńǵaıly otbasylyq nómirler baǵasy — 117 000 teńge. Sonymen birge eki adamǵa arnalǵan kereýeti bar ekonom nómirler baǵasy 29 000 teńge. Onda jýyný bólmesi qarastyrylmaǵan. Mereke kúnderi baǵa 20%-ǵa kóteriledi.
Munda Almatyǵa qaraǵanda syrǵanaý baǵasy arzan.
Tańǵy tarıf – 6 500 teńge.
Tórt saǵat syrǵanaý — 8 000 teńge.
Kúndizgi bılet – 14 500 teńge. Bul baǵa tek saǵat 17:00-ge deıin jaramdy.
Demalys jáne mereke kúnderi tórt saǵat syrǵanaý jáne qajetti qural-jabdyqtaryn jalǵa alý quny – 16 000 teńge. Al eger jumys kúnderi barsa bes adamdyq toptyń ár múshesine 17 200 teńge esepteledi. Kúndizgi abonentke túski as pen jalǵa alý aqysy kiredi.
Taǵy bir jergilikti keshen – Nurtaý. Bul — Óskemen qalasynan 35 shaqyrym qashyqtyqta jatqan 700-1 000 metr bıiktikte ornalasqan demalys orny. Munda alty syrǵanaý jolaǵy bar. Uzyndyǵy – 8 shaqyrymǵa jýyq. Kúndiz munda qyzmet quny — 7000 - 10 000 teńge aralyǵynda.
Býrabaı: qaraǵaıly orman, muz jáne qoljetimdi demalys
Aqmola oblysyndaǵy demalys ornyna adamdar elimizdiń túkpir-túkpirinen keledi. Qysta Býrabaıda eki adamǵa arnalǵan nómirlerdiń baǵasy — 15 000 – 24 000 teńge, komfort oryndarǵa — 28 000 – 30 000 teńge, al kottedjderge 500 000 teńge suraıdy. Qysta oryn tabý ońaı, tek mereke kúnderi aldyn ala tapsyrys berip (kem degende bir apta buryn) qoıǵan jón.
Kól betine muz qatqan kezde tabıǵı muz aıdyny qoldanysqa beriledi. Munda konkıdi jalǵa alý quny — 1 000-1 500 teńge. Shanamen syrǵanaý baǵasy — 1 500 –3 000 teńge. Haskı ıtterdi shanaǵa jegip berse, syrǵanaý quny — 3 000 – 6 000 teńge. At shanada serýendeý qyzmetiniń baǵasy 12 000 teńgeden bastalady.
Kvadrotsıkl qyzmetiniń quny — 30 mınýtqa 15 000 teńge nemese 1 saǵatqa 20 000 teńge. Sonymen birge qarda júrýge arnalǵan kólikpen serýendeý quny 30 000 teńgeden bastalady. Qysta balyq aýlaǵysy kelgender 8 000 – 10 000 teńge tóleıdi. Sondaı-aq saýna, monshaǵa túsip, mýzeı aralaýǵa bolady. Demalys oryndarynda tabıǵatty tamashalap, fotoǵa túsýge arnalǵan alańdar da bar.
Taý Samaly: Shymkent qalasy mańyndaǵy demalys
Shymkenttiń Tóle bı aýdany mańynda Taý Samaly demalys orny ornalasqan. Munda jeltoqsan-naýryz aılary aralyǵynda demalýǵa bolady. Syrǵanaý — 5 000 teńge, shańǵy men snoýbordty jalǵa alý – 3 000 – 6 000 teńge, barlyǵyn birge tańdasa shamamen — 10 000 teńge.
Qonaqúıde tańdaý kóp. Máselen eki oryndyq nómir baǵasy — 40 000 teńge, alty adamdyq lıýks baǵasy 110 000 teńge bolsa, kottedj quny – 90 000 teńge (kóterilý qyzmetine 20% jeńildik bar). VIP-kottedjdi jalǵa alý quny — 300 000 teńge. Munda saýna, bılıard jáne tórt jatyn bólmesi bar.
Buǵan deıin soǵym baǵasy men mobıldi baılanys qyzmetiniń baǵasy týraly jazyldy.