Elimizdegi eń jas ákim SQO-daǵy aýyldardyń birinde eńbek etedi
PETROPAVL. KAZINFORM – Soltústik Qazaqstan oblysy Voloshınka aýyldyq okrýginiń ákimi Oljas Sarqyt elimizdegi eń jas aýyl ákimi bolyp esepteledi.
26 jastaǵy Oljastyń bul qyzmetke kelgenine jarty jylǵa jýyqtaǵan. Buǵan deıin Ulttyq gvardııada qyzmet etip, mektepte ustaz bolǵan jas maman endi úsh eldi mekenniń áleýmettik máselesine jaýap beredi.
- Ózim osy Esil aýdanyndaǵy Spasovka aýylynyń týmasymyn. Bul jerdiń oıy-qyry jaqsy tanys. Aýyl ákiminiń saılaýyna úsh kandıdat tústik. Halyq qoldaý bildirdi, turǵyndardyń 80% maǵan daýys berdi. Olardyń senimin aqtap, aýylymyzdy kórkeıtýge bar kúshimdi jumsaımyn, - deıdi Oljas Sarqyt.
Oljastyń negizgi mamandyǵy – dene shynyqtyrý jáne sport pániniń muǵalimi. Bala kezinen sportqa beıim ol daryndy balalarǵa arnalǵan mamandandyrylǵan mektep-ınternatta bilim aldy. Keıin J. Qızatov atyndaǵy Esil aýyl sharýashylyǵy kolledjinde bilimin shyńdady.
Jas maman eńbek jolyn áskerı salamen baılanystyrdy. Ulttyq ulanda jaýyngerlik dene daıarlyǵy boıynsha nusqaýshy bolyp jumys istedi. Bul kezeń oǵan tártip pen jaýapkershiliktiń mańyzyn túsinýge múmkindik berdi.
Al osydan tórt jyl buryn Voloshınka orta mektebine alǵashqy áskerı jáne tehnologııalyq daıyndyq páni muǵalimi bolyp ornalasty. Ustazdyqpen qatar aýyldyń qoǵamdyq jáne sporttyq ómirine belsendi aralasty.
Endi ol Voloshınka aýyldyq okrýgin basqaryp otyr.
- Aýyldyq okrýg quramyna úsh eldi meken kiredi. Munda jalpy sany 860-qa jýyq adam turady. Olardyń kúndelikti máselesin sheshý, turǵyndardyń usynystaryn tyńdaý jáne aýyldyń damýyna jaǵdaı jasaý - meniń negizgi mindetim. Ákim bolyp jumys isteý úlken jaýapkershilik, - deıdi aýyl ákimi.
Oljas Samatuly qazir ýaqyty tyǵyz bolsa da sporttan qol úzgen joq. Jas ákim aýdandyq jáne oblystyq deńgeıdegi jarystarǵa turaqty qatysady. Ol memlekettik qyzmetshiler arasynda ótken sporttyq týrnırdiń jeńimpazy atansa, oblystyq kókpar jarysynda kúmis júldege ıe boldy. Al bıyl Voloshınka aýyldyq okrýginiń komandasy «Esil barysy» týrnırinde jalpykomandalyq esepte birinshi orynǵa qol jetkizip, aýdan ákiminiń kýbogyn jeńip aldy.
Jas ákimniń aıtýynsha, sport aýyl jastaryn biriktirip qana qoımaı, olardyń bos ýaqytyn tıimdi ótkizýine múmkindik beredi. Sondyqtan okrýgte sporttyq bastamalarǵa barynsha qoldaý kórestip keledi.
26 jasynda aýyldyq okrýg tizginin ustaǵan jas ákim úshin bul - alǵashqy úlken basqarýshylyq tájirıbe. Mamannyń endigi maqsaty - saılaýda bildirilgen senimdi naqty ispen aqtaý.
- Aýyldardaǵy keı kóshelerde jaryqtandyrý bolǵan joq. Men kelgeli 43 sham qoıyldy. Turǵyndar, sondaı-aq, ınternettiń, baılanystyń nasharlyǵyn jıi aıtady. Jaqynda bul máseleni sheshý úshin Voloshınka aýylyna uıaly baılanys munarasyn ornatý josparda bar, - deıdi Oljas Sarqyt.
Buǵan deıin elimizde 22 myńnan astam jas óz kásibin ashýǵa memlekettik grant alǵanyn jazǵan edik.
