Elimizdegi eń úzdik jumysshylar anyqtalady
ASTANA. KAZINFORM – «Eńbek joly» baıqaýy jalǵasyp jatyr. Qazir «Úzdik eńbek áýleti», «Óndiristiń úzdik jas mamany», «Jumys isteıtin jastardyń úzdik tálimgeri» nomınatsııalary boıynsha 60 jeńimpaz anyqtalǵan.
QR Eńbek jáne halyqty áleýmettik qorǵaý mınıstrligi jyl saıyn uıymdastyratyn bul konkýrstyń óńirlik kezeńi shilde aıynda aıaqtalǵan. Endi olar respýblıkalyq kezeńde óz óńirleriniń namysyn qorǵamaq.
– «Eńbek joly» baıqaýy 2014 jyldan bastap jyl saıyn uıymdastyrylady. Jobanyń basty maqsaty – jumysshy mamandyqtardyń bedelin arttyrý jáne elimizdegi jumysshy mamandardyń eńbegi qanshalyqty mańyzdy ekenin, ekonomıkamyzdaǵy rólin kórsetý. Bul baıqaýdy jergilikti atqarýshy organdar men bizdiń mınıstrlik birigip uıymdastyryp jatyr. Jarys aldymen óńirlerde, keıin respýblıkalyq deńgeıde ótedi. Óńirler arasyndaǵy báseke jyl saıyn qyrkúıek-jeltoqsan aılarynda bolady, - deıdi QR EHÁQM Eńbek jáne áleýmettik áriptestik departamentiniń basqarma basshysy «Búgin LIVE» baǵdarlamasyna bergen suhbatynda.
Uljan Qalımuratqyzy qandaı jumysshylar jeńimpaz atana alatynyn aıtty.
– Eń alǵashqy nomınatsııaǵa 20 jyldan astam eńbek tájirıbesi bar, bir kásippen aınalysatyn áýletterdiń arasynan irikteledi. Respýblıka boıynsha mundaı áýletter óte kóp. Máselen, temirjolshylar, óz kásibimen aınalysatyn jumyskerler. Olarǵa «Úzdik eńbek áýleti» nomınatsııasy beriledi. Ekinshi, 15-20 jyl aralyǵynda belgili bir salada jumys istep, ózinen keıingi jas mamandarǵa óz tálimin kórsetip, bolashaq bilikti mamandardy daıyndaýǵa kóp úles qosqan jumyskerler arasynda saıys bolady. Olarǵa «Jumys isteıtin jastardyń úzdik tálimgeri» nomınatsııasy tabystalady. Jáne «Óndiristiń úzdik jas mamany» da anyqtalady, - deıdi mınıstrlik ókili.
Basqarma basshysy bıylǵy baıqaýdyń ereksheligine toqtaldy.
– Bıyl «Eńbek joly» baıqaýy erekshe atalyp ótkeli jatyr. Sebebi Prezıdent bul jyldy «Jumysshy mamandyqtar jyly» dep jarııalady. Bizdiń konkýrsymyz jumysshy mamandardyń mártebesin kóterýge de tikeleı yqpal etedi. Mysaly, bıyl baıqaýymyzdy «Eńbek kúnine» baılanystyryp, Qaraǵandy oblysy, Temirtaý qalasynda ótkizýdi josparlap otyrmyz. Sebebi, Temirtaý naǵyz óndiristiń otany, - deıdi Uljan Qalımuratqyzy.
Al respýblıkalyq baıqaýdyń jeńimpazdary jeltoqsan aıyna deıin anyqtalady.
– Respýblıkalyq baıqaýdyń nátıjesi qarasha aıynyń sońynda nemese jeltoqsan aıynyń basynda belgili bolady. Bıyl 505 azamattan ótinim tústi. Onyń 51-in tańdap alamyz. Olardyń 9-na memlekettik nagrada beriledi. Qalǵandaryna sertıfıkat tabystaımyz. Baıqaý jyl saıyn uıymdastyrylǵandyqtan, bıyl irikteýden ótpegen otbasylarǵa kelesi jyly kóbirek múmkindik beremiz, - deıdi basqarma basshysy.
Aıta keteıik, Túrkistan oblysyndaǵy Kentaý qalasynda jumysshy mamandardy daıarlaıtyn biregeı oqý orny bar.