Elimizdegi eń basty otbasylyq qundylyq ne – zertteý nátıjesi
ASTANA. KAZINFORM – Elordada ótken SARAP sarapshylyq klýbynyń otyrysynda Otbasy jáne genderlik saıasat salasyndaǵy zertteý ortalyǵynyń basshysy Aqnur Imanqul elimizde júrgizilgen áleýmettik zertteý nátıjelerin tanystyrdy.
- Elimizde eń basty otbasylyq qundylyqtar – ózara syılastyq jáne bir-birine qurmet kórsetý. Bul jaýap nusqasyn 2020 jyldary saýalnamaǵa qatysqan respondentterdiń 80 paıyzdan astamy tańdaıtyn. Biraq qazir sál bolsa da materıaldyq qundylyqtar, kóńil kúı, psıhologııalyq jaılylyq sııaqty jaýap nusqalaryn tańdaıtyn respondentter sany artyp keledi. Dúnıejúzilik qundylyqtarǵa sholý deregine sáıkes, Qazaqstan áli de otbasyna, dinge jáne bedelge qatty baǵdarlanǵan memleket ustanymyn ıelenip, dástúri qaǵıdattardan aınymaǵanyn kórsetti. ıAǵnı, elimizdiń respondentteriniń 90 paıyzdan astamy áli de otbasy olardyń ómirlik basymdyqtar ıerarhııasynda birinshi turatynyn atap ótedi. Jalpy, bizden BAQ ókilderi «ajyrasý nege kóp, elimizde otbasy ınstıtýty nege nyǵaımaı otyr?» degen saýaldy jıi qoıady. Biraq zertteý júrgizgen ýaqytta otbasy áli de basty qundylyq ekenin anyqtadyq, - dedi ol.
Onyń aıtýynsha, zertteý aıasynda respondentterden balanyń boıyna eń birinshi kezekte qandaı qundylyqtardy sińirgisi keletini suralǵan.
- Sebebi ata-analardyń balalaryn qandaı baǵytta tárbıelep otyrǵanyn bilgimiz keldi. Zertteý nátıjesinde ata-analar birinshi kezekte balalarynyń boıyna eńbekqorlyqty, shynshyldyqty jáne úlkenderdi qurmetteýdi sińirýge tyrysatyny anyqtaldy. Balalardy tárbıeleý kezinde ata-analardyń qandaı qıyndyqtarǵa tap bolatynyn da anyqtaýǵa tyrystyq. Zertteý Qazaqstanda sanaly túrde ata-ana bolý qoǵamda tereń tamyr jaıǵan otbasylyq qundylyq ekenin, kóp ata-ana úshin negizgi baǵdar bolatynyn kórsetti. Jalpy, ana-analar úshin otbasylyq basty qundylyqtar ishinde bala úshinshi orynda tur, - dedi Aqnur Imanqul.
Aıta keteıik, Biryńǵaı áleýmettik qoldaý sharalary standartyna sáıkes, otbasylardyń muqtajdyq deńgeıi endi tsıfrlyq otbasy kartasyndaǵy derekter negizinde avtomatty túrde jáne jańartylǵan krıterııler boıynsha aıqyndalady.