Elimizdegi eń aýqatty zeınetker 742 myń teńge zeınetaqy alady
ASTANA. KAZINFORM — Biryńǵaı jınaqtaýshy zeınetaqy qory salymshylarynyń zeınetaqy jınaǵy 2023 jyly 3,2 trıllıon teńgege ulǵaıdy.
2024 jylǵy 1 qańtarda Biryńǵaı jınaqtaýshy zeınetaqy qory salymshylarynyń shotynda 17,9 trıllıon teńge zeınetaqy jınaldy.
2023 jyly jınaq somasy 3,2 trln teńgege nemese 21,8% ulǵaıdy.
Zeınetaqy basym somasy mindetti zeınetaqy jarnasy (MZJ) esebinen qalyptasyp, 17,3 trln teńgege jetti (2023 jylǵy ósim — 21,6%).
Mindetti kásiptik zeınetaqy jarnalary (MKZJ) boıynsha soma — 568,5 mlrd teńge (2023 jylǵy ósim — 27,6%), erikti zeınetaqy jarnasy (EZJ) — shamamen 5,3 mlrd teńge (2023 jylǵy ósim — 48,3%) boldy.
2023 jyly salymshylardyń shotyna shamamen 2,2 trln teńge kóleminde zeınetaqy jarnasy tústi.
Ol ótken jylǵy kórsetkishten 434,6 mlrd teńgege nemese 25,2% artyq.
Jarnanyń jalpy kóleminiń 95,5% BJZQ-ǵa MZJ esebinen túsetin túsim quraıdy. Onyń kólemi — 2,1 trln teńge (bir jyldaǵy ósim — 25,3%).
MKZJ esebinen 95,5 mlrd teńgeden astam qarajat tústi (bir jyldaǵy ósim — 24%). EZJ kólemi 2,3 mlrd teńge.
Zeınetaqy jınaqtarynyń edáýir ósýine salymshylardyń zeınetaqy jarnalary esebinen ǵana emes, sonymen qatar 2023 jyly shamamen 1,6 trln teńgeni quraǵan taza ınvestıtsııalyq kiristiń arqasynda qol jetkizildi. Bul ótken jyldyń kórsetkishterinen 685,4 mlrd teńgege nemese 77,7% artyq.
BJZQ-daǵy jeke zeınetaqy shotynyń sany 12,3 mln boldy.
2023 jyly BJZQ salymshylaryna 591,3 mlrd teńge tóledi.
Onyń ishinde turǵyn úı jaǵdaılaryn jaqsartý jáne emdelý maqsatyndaǵy birjolǵy zeınetaqy tólemderi (BZT) - 284 mlrd teńge bolsa, jasyna baılanysty tólemder — 150,6 mlrd teńge, saqtandyrý uıymdaryna aýdarymdar — 54 mlrd teńge, muragerlik boıynsha tólemder — 52,6 mlrd teńge, Qazaqstannan tys jerlerge turaqty turýǵa ketýge baılanysty tólemder — 39,8 mlrd teńge, jerleýge beriletin tólemder — 7,5 mlrd teńge jáne múgedektik boıynsha tólemder — 2,8 mlrd teńge.
Atap ketý kerek, zeınet jasyna tolýǵa baılanysty BJZQ-dan keste boıynsha ortasha aılyq tólem somasy — 32 202 teńge, al aı saıynǵy tólemniń eń joǵarǵy somasy — 742 692 teńge.
Esterińizge sala keteıik, ótken jyldyń sáıkes kezeńinde aı saıynǵy tólemniń ortasha somasy — 29 973 teńge, al aı saıynǵy tólemniń eń joǵary somasy — 707 326 teńge edi.
