Elimizdegi egin alqabynyń 10,7% jınaldy - Úkimet
ASTANA. KAZINFORM – 2025 jylǵy 22 tamyzdaǵy jaǵdaı boıynsha elimizde egin jınaý naýqany 15 óńirdi qamtydy. Elimizdiń ońtústik aımaqtarynda egin jınaý naýqany aıaqtalýǵa jaqyn. Shymkentte egin oraǵy tolyǵymen aıaqtaldy, dep habarlaıdy Úkimettiń baspasóz qyzmeti.
Aýyl sharýashylyǵy mınıstrliginiń jedel derekterine sáıkes, qazirdiń ózinde 1,7 mln gektar astyq jınaldy, bul jalpy egin alqabynyń 10,7%-yn quraıdy jáne 2,4 mln tonna astyq bastyryldy.
Egin jınaý jumystaryna 300 myńnan astam tehnıka: 139 myń traktor, 31 myń kombaın, 17 myń astyq jınaıtyn mashına jáne 130 myń basqa da tehnıkalar jumyldyryldy.
Energetıka mınıstrligimen birlesip, dızel otynyn tıep jóneltý boıynsha munaı óńdeý zaýyttaryna óńirlerdi bólý kestesi bekitildi. Sonyń arqasynda aýyl sharýashylyǵy taýaryn óndirýshileri dızel otynyn lıtrine 254 teńgeden alyp otyr, bul naryqtaǵy baǵadan 18-20%-ǵa tómen. Qazirgi ýaqytta 135,4 myń tonna janarmaı jóneltildi.
Dıqandar jospardaǵy mıneraldy tyńaıtqyshtarmen 89% qamtamasyz etilgen, jalpy 1,7 mln tonna tyńaıtqysh jetkizildi. Qoımalarda taǵy 43,3 myń tonna tyńaıtqysh bar.
Memleket basshysynyń tapsyrmasy boıynsha alǵash ret 2024 jyly egis jáne jıyn-terim naýqanyn erte qarjylandyrý baǵdarlamasy iske qosyldy.
Búginde fermerlerdi qarjylandyrý jalǵasýda:
— jeńildetilgen nesıeleý baǵdarlamasy boıynsha 502,7 mlrd teńgege 7594 ótinim berildi,
— «jeńildikti lızıng» baǵdarlamasy boıynsha 153,4 mlrd teńgege kelisim-shart jasaldy,
— «Damý» qory arqyly 228 mlrd teńgege 1312 kepildik berildi.
Jınalǵan eginniń saqtalýyn qamtamasyz etý úshin elevatorlardyń jańa ónimdi qabyldaýǵa daıyndyǵyna turaqty baqylaý júrgiziledi.
Oblys ákimdikteriniń derekteri boıynsha respýblıkadaǵy astyq saqtaý qoımalarynyń jalpy syıymdylyǵy 30,7 mln tonnany quraıdy, onyń ishinde jumys istep turǵan lıtsenzııasy bar astyq qabyldaý kásiporyndarynda (AQK) – 13,3 mln tonna, aýyl sharýashylyǵy taýaryn óndirýshilerde – 17,4 mln tonna.
Saqtaý syıymdylyǵynyń kórsetilgen kólemi ótken jyldardyń aýyspaly qaldyqtaryn eskere otyryp, jınalǵan egindi saqtaýǵa jetkilikti. Lıtsenzııalanǵan astyq qoımalarynyń toltyrylý kórsetkishi 2,2 mln tonnany nemese 16%-dy quraıdy. Elevatorlar men astyq qoımalarynda oryn tapshylyǵy joq.
2025 jylǵy egin jınaý naýqanynyń barysy Úkimettiń turaqty baqylaýynda.
Osyǵan deıin Oljas Bektenov avtokólik joldarynyń sapasyn baqylaýdy kúsheıtý týraly tapsyrma berdi.