Elimizdegi bir áýekompanııaǵa bortyn aýystyrý týraly tapsyrma berildi
«Air Astana» áýekompanııasy áýe kemelerin jolaýshylarǵa aldyn ala tıisti habarlamasyz «Fly Arystan» áýe kemesine aýystyrý jaǵdaıy kóbeıgen. Osyǵan baılanysty Kólik vıtse-mınıstri Talǵat Lastaev «Air Astana» AQ-men jumys keńesin ótkizdi, dep habarlaıdy Kazinform mınıstrliktiń baspasóz qyzmetine silteme jasap.
Osyǵan deıin «Air Astana» áýe kompanııasy 31 588 reıs oryndady. Onyń ishinde 226 reıste «Air Astana» áýekompanııasynyń áýe kemeleri «Fly Arystan» áýe kemelerine aýystyryldy, bul oryndalǵan reısterdiń jalpy sanynyń 0,7%-y.
Keńes nátıjesinde «Air Astana» áýekompanııasyna mynadaı tapsyrma berildi:
1) «Air Astana» áýe kemelerin «Fly Arystan» áýe kemelerine aýystyrý praktıkasyn barynsha azaıtý jóninde sharalar qabyldasyn;
2) áýe kemelerin aýystyrǵan jaǵdaıda jolaýshylardy aldyn ala habardar etý boıynsha jumysty ornatý jáne qamtamasyz etý;
3) áýe kemeni aýystyrǵan jaǵdaıda jolaýshylarǵa ótemaqy tóleý tártibi boıynsha usynystar ázirleý;
4) «Air Astana» rezervtik áýe kemeleriniń sanyn 1-den 2-ge deıin ulǵaıtý jóninde sharalar qabyldaý.
«Qazaqstan Respýblıkasynyń Kólik mınıstrligi óz kezeginde reıs mártebesi ózgergen kezde jolaýshylar quqyqtarynyń saqtalýyna monıtorıng júrgizý boıynsha jumysty jalǵastyrady jáne buzýshylyqtar anyqtalǵan jaǵdaıda ákimshilik sharalar qabyldaıdy», - delingen habarlamada.
