Elimizdegi bes ýnıversıtet alǵash ret álemniń úzdik joǵary oqý oryndary qataryna qosyldy

Ǵylym jáne joǵary bilim mınıstrligi málimetinshe, búginde elimizde AQSh, Ulybrıtanııa, Qytaı, Germanııa, Frantsııa, Ońtústik Koreıa, Reseı jáne basqa da memleketterdiń jetekshi bilim berý júıelerin usynatyn 33 sheteldik ýnıversıtettiń fılıaly jumys isteıdi.

Halyqaralyq akademııalyq yntymaqtastyqty odan ári keńeıtý maqsatynda zańnamalyq baza jetildirilip jatyr. Qabyldanǵan zańnamalyq ózgerister sheteldik ýnıversıtetterdiń fılıaldaryn ashý rásimin jeńildetip, olardyń qyzmetine qoıylatyn biryńǵaı talaptardy belgileıdi, memlekettik baqylaý tetikterin kúsheıtedi jáne sonymen qatar Qazaqstanǵa álemniń jetekshi ýnıversıtetterin tartýǵa qolaıly jaǵdaı jasaıdy. Sonymen birge Qazaqstan tarıhy men qazaq tilin oqytýdy qamtıtyn ulttyq bilim berý komponentin saqtaý mindetti talap bolyp qala beredi.

Sonymen qatar qazaqstandyq ýnıversıtetterdiń halyqaralyq keńistiktegi qatysý aıasy da keńeıip keledi. Sońǵy jyldary otandyq joǵary oqý oryndarynyń fılıaldary Qyrǵyzstanda, Ózbekstanda, Tájikstanda jáne Reseı Federatsııasynda ashyldy. Bul qazaqstandyq joǵary bilimniń halyqaralyq deńgeıde ilgerileýine, akademııalyq baılanystardyń nyǵaıýyna jáne óńirdegi ortaq bilim berý keńistiginiń qalyptasýyna yqpal etedi.

Birlesken bilim berý baǵdarlamalarynyń jelisi de qarqyndy damyp keledi. Qazirgi tańda qazaqstandyq ýnıversıtetterdiń jartysynan astamy álemniń 24 elindegi 131 sheteldik ýnıversıtetpen birlesip qos dıplomdy bilim berý baǵdarlamalaryn júzege asyrady. Sonyń jarqyn mysaldarynyń biri – Manash Qozybaev atyndaǵy Soltústik Qazaqstan ýnıversıteti men Arızona ýnıversıteti arasyndaǵy yntymaqtastyq.

2026 jyly qos dıplom baǵdarlamasy boıynsha bilim alǵan alǵashqy túlekter oqýyn aıaqtap, bul halyqaralyq ýnıversıtettik seriktestikti damytýdaǵy mańyzdy kezeńge aınaldy.

Otandyq joǵary bilimniń sapasy halyqaralyq deńgeıde de joǵary baǵalanyp jatyr.

Qazaqstandyq ýnıversıtetter bedeldi álemdik reıtıngterdegi óz pozıtsııalaryn turaqty túrde nyǵaıtyp keledi. QS World University Rankings 2026 reıtıngine elimizdiń 20 joǵary oqý orny ense, Times Higher Education 2026 reıtınginde alǵash ret Qazaqstannyń birden bes ýnıversıteti álemniń úzdik joǵary oqý oryndarynyń qataryna qosyldy. Al Nazarbayev University álemniń úzdik 500 ýnıversıtetiniń qataryna enip, qazaqstandyq joǵary bilimniń halyqaralyq arenadaǵy bedeliniń artyp kele jatqanyn aıqyn kórsetti.

Almatyda ýnıversıtetter arasyndaǵy tuńǵysh FIDE álem chempıonaty ótetinin jazǵan bolatynbyz.