Elimizdegi bedeldi ýnıversıtet Ashhabadta óz fılıalyn ashady
ASTANA. KAZINFORM – Qazaqstandaǵy betke ustar JOO-lardyń biri Túrikmenstan astanasynda óz fılıalyn ashady. Bul týraly Túrikmenstan Mınıstrler kabıneti tóraǵasynyń orynbasary – Syrtqy ister mınıstri Rashıd Meredovpen ótken kelissózden keıin Premer-mınıstrdiń orynbasary – Syrtqy ister mınıstri Murat Nurtileý aıtty.
— Mádenı-gýmanıtarlyq baılanystarǵa kelsek, Qazaqstan men Túrikmenstanda turatyn dıasporalar – eki eldi qosyp, túıistirip otyrǵan «altyn kópir» dep esepteımiz. Sońǵy jyldary bul rette birqatar naqty ári pármendi jumys júrgizilip keledi. Astana men Ashhabatta qazaq pen túrikmenniń kórnekti perzentteri – Abaıǵa, Maqtumqulyǵa jáne Qurmanǵazyǵa byltyr boı kótergen eskertkishter dostyǵymyzdyń aıqyn sımvoly deýge tolyq negiz bar. Qazaqstan men Túrikmenstannyń mádenıet kúnderiniń ótýi joǵary baǵalanyp, qoǵamda erekshe yqylaspen qabyldandy, - dedi ol.
Sondaı-aq SІM basshysy eki eldiń joǵary bilim berý salasyndaǵy áriptestigine qatysty tyń málimet aıtty.
— Bilim berý jáne jastar saıasaty aıasyndaǵy suhbat barysynda Qazaqstandaǵy betke ustar joǵary oqý oryndarynyń biri Ashhabatta óziniń fılıalyn ashýǵa daıyn ekenin rastadym. Osy jaqyn bolashaqta joǵary bedeldi is-saparlar barysynda naqty áriptester, seriktesterdiń attary atalyp ótedi dep oılaımyn, - dedi SІM basshysy.
Odan bólek, mınıstr aqparat salasyndaǵy baılanys damyp kele jatqanyn aıta kele, qazaqstandyq telearna Túrikmenstanda kórsetilýi múmkin ekenin málimdedi.
— Silk Way arnasynda túrikmen dostarymyz týraly jańalyqtar jıi jarııalanyp júr. Baýyrlas halyqtarymyzdy odan ári jaqyndastyrý maqsatynda Qazaqstannyń «Silk Way» jáne «Silk Way Cinema» arnalaryn Túrikmenstannyń teledıdar operatorlarynyń paketterine engizýdi óz tarapymnan usyndym, - dedi Murat Nurtileý.
Aıta keteıik, Qazaqstan men Túrikmenstan arasynda taýar aınalymy 1 mlrd dollarǵa deıin artpaq.
Sondaı-aq SІM basshysy qazaq-túrikmen kólik-tranzıt baılanysy salasyndaǵy basty jobalardy ataǵan edi.