Elimizdegi barlyq ýchaskede daýys berý júrip jatyr

ASTANA. KAZINFORM – Elimizdegi barlyq ýchaskede daýys berý júrip jatyr. Bul týraly Ortalyq referendým komıssııasy tóraǵasynyń orynbasary Muhtar Erman aıtty.

- Ortalyq referendým komıssııasy oblystardyń, Astana, Almaty, Shymkent qalalary usynǵan aqparatqa sáıkes, saǵat 7-00-degi jaǵdaı boıynsha óńirlerde 10 388 ýchaske daýys berýge kiriskenin habarlaıdy. Aýmaqtyq komıssııalardyń sheshimderine sáıkes, 92 ýchaskede daýys berý tańǵy saǵat 06-00-de bastaldy. Azamattardyń tizimine 12 461 796 adam engizilgen. Olardyń 17 514-i daýys berý quqyǵyn beretin esepten shyǵarý kýáligin aldy. Barlyǵy 10 388 ýchaskesi bar. Onyń ishinde 54 shet memlekette – 71 ýchaske, - dedi Muhtar Erman.

Onyń málimetinshe, 1 saǵattan keıin Syrtqy ister mınıstrliginiń sheteldegi ýchaskelerdiń ashylýy týraly aqparat usynylady. Sonymen qatar Ortalyq referendým komıssııasy saǵat 10-00-den bastap, 2 saǵat saıyn azamattardyń referendýmǵa qatysýy boıynsha málimetterdi habarlaıdy.

Aıta keteıik, daýys berý ýchaskeleri saǵat 7:00-den 20:00-ge deıin ashyq bolady. 

Komıssııa málimetinshe, elimizde 12 461 796 daýys berýshi tirkelgen. Zań boıynsha, osy sannan 1% artyq bıýlleten ázirlenedi. Demek, 12 586 414 bıýlleten bolmaq. Alaıda jyrtyp ne búldirip alsa, azamattarǵa jańa bıýlleten berilmeıdi.

Eger azamat eshqaıda tirkelmegen bolsa, munyń da sheshimi qarastyrylǵan. El boıynsha 220 ýchaskege 1 táýlikke tirkelýge bolady. Mundaı jaǵdaıda azamat tizimge engizilip, daýys berý úshin oǵan bıýlleten usynylady.