ІІM: Birde-bir saılaý ýchaskesinde qoǵamdyq tártipti óreskel buzý faktisi tirkelmedi
ASTANA. KAZINFORM — Quryltaı depýtattaryn saılaý kúni Qazaqstannyń barlyq óńirinde qoǵamdyq tártip pen azamattardyń qaýipsizdigi qamtamasyz etildi. Bul týraly OKQ-da ótken brıfıngte QR ІІM resmı ókili Shyńǵys Alekeshev málimdedi.
Onyń aıtýynsha, eldegi 10 myńnan astam saılaý ýchaskesiniń eshqaısysynda qoǵamdyq tártipti óreskel buzý faktisi tirkelmegen.
— On myńnan astam saılaý ýchaskesiniń birde-birinde qoǵamdyq tártipti óreskel buzý faktilerine jol berilgen joq. Qazirgi ýaqytta ýchaskelerde daýystardy sanaý jalǵasyp jatyr. Daýys berý aıaqtalǵanymen, ishki ister organdarynyń jumysy jalǵasyp jatyr, — dedi Shyńǵys Alekeshev.
ІІM ókili saılaý qujattaryn saılaý komıssııalaryna qaýipsiz jetkizý qamtamasyz etiletinin atap ótti. Polıtsııa saılaýǵa qatysty barlyq is-shara tolyq aıaqtalǵanǵa deıin kúsheıtilgen rejımde jumysyn jalǵastyrady.
Vedomstvo saılaý barysyndaǵy jaǵdaıdy baqylaýda ustap otyr.
Aıta keteıik, Qazaqstanda Quryltaı depýtattaryn saılaý boıynsha daýys berý aıaqtaldy. Jergilikti ýaqyt boıynsha saǵat 20:00-de el aýmaǵyndaǵy saılaý ýchaskeleri jabylyp, komıssııalar daýystardy sanaýǵa kiristi.
