Elimizdegi barlyq bilim ordasy zamanaýı «Keleshek mektepterine» aınalady – mınıstr
ASTANA. KAZINFORM – Aldaǵy 3 jylda elimizde apatty nemese eski mektep qalmaýy tıis. Bul týraly BIZDIÑ ORTA podkasynda Oqý-aǵartý mınıstri Ǵanı Beısembaev aıtty.
– «Jaıly mektepter» qala men aýyl mektepteri arasyndaǵy alshaqtyqty joıýǵa, úsh aýysymdy jáne apatty mektepterdiń máselesin tolyqqandy sheshýge baǵyttalǵan, buǵan deıin bolmaǵan teńdessiz ári eń utymdy ulttyq jobalardyń biri dep esepteımin. Búginde osy mektepterdiń qurylysyna baılanysty búkil óńirde jumys qolǵa alynǵanyn kórip otyrmyz. Joba arqasynda qazir 100-den asa úsh aýysymdy mektep máselesi sheshilip, 30-dan asa apatty mektep joıyldy. Munan bólek, oqýshy orny tapshylyǵy bar 200-den asa mekteptiń de máselesi túbegeıli sheshildi. Jalpy, bıyl kútetin úlken nátıjemiz – ulttyq joba negizinde úsh aýysymdy mektep máselesin tolyqtaı kún tártibinen alyp tastaý, - dedi ol.
Mınıstrdiń aıtýynsha, 2019-2020 jyldary aldaǵy 5 jyldan keıin elmizde 1,5 mln-ǵa jýyq oqýshy orny tapshylyǵy bolatyndyǵy aıtylyp, ony sheshý úshin 1 myń mektep salý máselesi kóterilgen. Osydan keıin Prezıdent tapsyrmasymen bul másele shuǵyl qolǵa alynyp, sońǵy 6 jyldyń ishinde myńnan astam mektep salynǵan jáne 1,5 mln-nan asa oqýshy orny paıdalanýǵa berilgen. Sonymen qatar ol «Jaıly mektep» jobasy aıasynda 217 mektep salynyp, 460 myń oqýshy orny qamtamasyz etiletinin atap ótti.
– Búginde mektepter barlyq zamanaýı talapqa saı salynyp jatyr. Bıyldyń ózinde 105 mektep paıdalýǵa berildi. Jyldyń sońyna deıin taǵy 112 mektep paıdalanýǵa berilmek. Qazir osy mektepterdiń qurylysy júrgizilip jatyr, keıbiri aıaqtalýǵa jaqyn. Mektepterdiń ınfraqurylymy ózgeshe, 21 ǵasyrdyń jańa zamanaýı talaptaryna saı. Degenmen, onyń ishki mazmunyn da retke keltirý baǵytynda jumys bastalyp ketti. Bul mektepterli erekshe basqarý qajettiligi de týyndap otyr. 217 mekteptiń ishki mazmunyn da, sapasyn da zamanaýı deńgeıge jetkizý úshin Y.Altynsarın atyndaǵy Ulttyq bilim akademııasy janynda osy mektepterdi basqaratyn júıe qurylyp jatyr. Atalǵan júıe negizinde mektepterdiń ishki mazmuny, onyń kadrlyq saıasaty, basqarý stıli basqarýshylyq toptyń qolynda bolady, - dedi Ǵanı Beısembaev.
Mınıstr atalǵan 217 mekteptiń modeli negizinde elimizdegi qalǵan 8 myń mekteptiń jaǵdaıyn jaqsartý jumystary qolǵa alynǵan.
– Jyl saıyn myńnan asa zamanaýı kabınet qalǵan mektepterge satyp alynyp jatyr. Onyń ústine jyl saıyn kúrdeli jóndeýden 300-ge jýyq mektep ótedi. Prezıdent pármenimen 1 300 mektepti qaıta jańartý baǵdarlamasy qolǵa alynyp jatyr. Onyń aıasynda qalǵan mektepterdiń barlyǵyn zamanaýı deńgeıge jetkizemiz. ıAǵnı, 3 jyldyń ishinde elimizde apatty nemese eski mektep qalmaýy tıis. Olardyń barlyǵy zamanaýı deńgeıge jetkizilýi kerek. Túpkilikti jetistik – árkimniń úıiniń janyndaǵy mektep eń myqty mektep sanalýy qajet. «Keleshek mektepterimiz» zamanaýı sońǵy talaptarǵa jaýap beretin mektepterdiń qataryna qosylýy kerek.
Búginde mektepterdiń oqý protsesine ońtaıly ózgerister engizý, basqarý stılin zamanaýı deńgeıge jetkizý jáne muǵalimderdi de zaman talaptaryna saı oqytý qolǵa alyǵan. Qazir bul mektepterdiń qural-jabdyqtary zamanaýı bolǵandyqtan, onda qyzmet etetin muǵalimderdiń qarym-qabileti men sol oqý-quraldarmen jumys isteý daǵdysyn da shyńdaýymyz qajet. Qazirgi deıin 3 myń muǵalim arnaıy daıyndyqtan ótti. Bul mektepterdiń eń úlken ereksheliginiń biri – árbir balaǵa qoljetimdi jáne árbir balanyń jeke qarym-qabiletin eskere otyryp, onyń tulǵa bolyp qalyptasýyna tolyqqandy kómektesetin jaıly da qolaıly orta qalyptastyrý, - dedi Ǵanı Beısembaev.
Eske sala keteıik, buǵan deıin Oqý-aǵartý mınıstri Ǵanı Beısembaev elordalyq oqýshylarǵa synyp saǵatyn ótkizgenin jazǵan edik.