Elimizdegi balalardyń ál-aýqat ındeksi 2,5 pýnktke artty

ASTANA.KAZINFORM – 2024 jyldyń qorytyndysy boıynsha Qazaqstanda balalardyń ál-aýqat ındeksiniń turaqty ósimi baıqaldy. Ortasha respýblıkalyq kórsetkish 2,5 pýnktke kóterilip, 2023 jylǵy 56,1 baldan 58,6 balǵa jetti.

Oqý-aǵartý mınıstrligi málimetinshe, segiz óńir ortasha deńgeıden joǵary nátıje kórsetti — 59,4-ten 64,6 balǵa deıin. Kósh basynda 64,6 ball nátıjesimen Aqtóbe oblysy tur, bul ótken jylmen salystyrǵanda 5,6 pýnktke artyq. Pavlodar oblysy da joǵary deńgeıin saqtap qaldy — 63,3 ball. Eleýli ósim Almaty qalasynda (+6,9) jáne Qostanaı oblysynda (+6,4) tirkeldi.

- Memleket basshysynyń tapsyrmasyna sáıkes 2022 jyldan bastap Qazaqstanda balalardyń ál-aýqat ındeksi engizildi. Bul kórsetkish óńirler arasyndaǵy nátıjelerdi jáne halyqaralyq deńgeıdegi kórsetkishterdi salystyrýǵa múmkindik beredi, sondaı-aq memleket pen qoǵamnyń nazaryn balalyq shaq máselelerine aýdarady, - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.

Indeks tórt baǵyt boıynsha 56 kórsetkishten qalyptasady: «Bala», «Otbasy jáne qoǵam», «Memlekettik saıasat» jáne «Eldiń ál-aýqaty». Ol 35 statıstıkalyq jáne 21 saýalnamalyq derekterge negizdelgen.

Kórsetkishter bala densaýlyǵy men damýyn, otbasylyq jáne áleýmettik ortany, sondaı-aq bilim berý, densaýlyq saqtaý, áleýmettik qorǵaý, ekologııa jáne ınfraqurylym salalaryndaǵy memlekettik saıasattyń tıimdiligin qamtıdy.

Aıta keteıik, erekshe balalardy qoldaý týraly zań jobasy ázirlenip jatyr.