Elimizdegi balabaqshalarda ilki joba iske qosyldy

ASTANA. KAZINFORM – «Erte jastan eńbekke jáne kásipke baýlý» dep atalatyn joba búldirshinderdi eńbeksúıgishtikke tárbıeleýdi jáne olardyń qabiletin jetildirýdi maqsat etedi. Ol jóninde QR Oqý-aǵartý mınıstrligi resmı saýalymyzǵa joldaǵan jaýabynda tolyǵyraq málimet berdi.

– Elimizdiń ár óńirinen 5 mektepke deıingi uıym (3 memlekettik, 2 jekemenshik), barlyǵy 100 mektepke deıingi uıym (62 memlekettik, 38 jekemenshik) qamtyldy. Pılottyq jobaǵa qatysatyn mektepke deıingi uıymdar bilim basqarmalarynyń usynysymen tańdaldy. Jobaǵa 100 mektepke deıingi uıymnyń basshylary, 134 ádiskeri jáne 652 tárbıeshi, 8456 bala (4 jastaǵy balalar – 4494, 5 jastaǵy balalar – 3962) qatysady, – delingen habarlamada.

Joba barysynda búldirshinder qaýipsizdik erejelerin saqtaı otyryp, qarapaıym daǵdylardy meńgeredi. Monshaqtan, folgadan, matadan, teriden, júnnen jáne t.b. materıaldardan túrli buıymdar jasaıdy. Sazbalshyq, tas, aǵash, qamys, ermeksaz, gıps tárizdi zattardan shaǵyn músinder daıyndaıdy. Qyz balalar jemis pen kókónisten salat pen táttiler ázirleıdi. Sondaı-aq balalar mamandardyń kómegimen osy sekildi t.b. tapsyrmalardy oryndaıdy.

– Bul jobany QR Oqý-aǵartý mınıstrliginiń Mektepke deıingi bilim berý departamenti, «Balalardy erte damytý ınstıtýty» RMM, oblystar men Astana, Almaty, Shymkent qalalarynyń bilim basqarmalary, oblystyq ádistemelik ortalyqtar (kabınetter), mektepke deıingi uıymdar júzege asyrylýyn qamtamasyz etedi, – delingen resmı habarlamada.

Mınıstrliktiń málimetinshe, atalǵan pılottyq jobany júzege asyrýǵa bıýdjetten qarajat qarastyrylmaǵan. Ol bıyl jeltoqsan aıynda aıaqtalady. Búldirshinderdiń nátıjeleri, pedagogterdiń usynystary eskerilip, aldaǵy ýaqytta elimizdegi barlyq balabaqsha baǵdarlamasyna engizilýi múmkin.

Eske salaıyq buǵan deıin 2027 jyldan bastap balabaqshalardy lıtsenzııalaýǵa daıyndyq qalaı júrip jatqany jóninde jazǵanbyz.