Elimizdegi azyq-túlik óndirisiniń kólemi 8,1 paıyzǵa artty
ASTANA. KAZINFORM - Bul týraly QR Aýyl sharýashylyǵy mınıstrliginde Aıdarbek Saparovtyń tóraǵalyǵymen óńdeý ónerkásibin damytý máselelerine arnalǵan alqa otyrysy barysynda aıtyldy, dep habarlaıdy mınıstrliktiń baspasóz qyzmeti.
Aıdarbek Saparov otyrysta aýyl sharýashylyǵy ónimderin óńdeý agroónerkásiptik keshendi damytýdyń basym baǵyttarynyń biri ekenin atap ótti.
Onyń aıtýynsha, bul sala eldiń azyq-túlik qaýipsizdigin qamtamasyz etip qana qoımaı, qosylǵan quny joǵary ónim óndirýge jáne eksporttyq áleýetti nyǵaıtýǵa yqpal etip otyr.
- Memlekettiń júıeli qoldaýynyń arqasynda aýyl sharýashylyǵy taýaryn óndirýshiler qarjylyq resýrstarǵa qol jetkizip, agrotehnologııalyq úderisterdi tolyqtaı qoldanysqa engizý múmkindigine ıe boldy. Búginde elimiz ishki naryqty negizgi azyq-túlik ónimderimen tolyq qamtamasyz etip otyr. Importqa táýeldi baǵyttar boıynsha ınvestorlardy tartý jáne jańa jobalardy júzege asyrý úshin qolaıly jaǵdaı jasaý jumystary júrip jatyr. Bizdiń basty mindetimiz – agroónerkásiptik keshendegi óńdelgen ónim úlesin 70 paıyzǵa deıin jetkizip, qosylǵan quny joǵary ónim óndirisin arttyrý, – dedi mınıstr.
Aýyl sharýashylyǵy vıtse-mınıstri Ermek Kenjehanuly salanyń búgingi ahýaly men damý perspektıvalary týraly baıandady.
Óńdeý kásiporyndaryn qoldaý maqsatynda memleket jeńildetilgen qarjylandyrý jáne ınvestıtsııalyq sýbsıdııalaý tetikterin iske asyrý ústinde. 2024–2025 jyldary aınalym qarajatyn tolyqtyrý úshin 196 óńdeý kásipornyna jalpy somasy 131 mlrd teńge kóleminde qarjy bólindi. Al 2026 jyly bul maqsatqa 100 mlrd teńge qarastyrylǵan.
Ótken jyly óńdeý salasynda quny 120,4 mlrd teńgeni bolatyn 53 ınvestıtsııalyq joba paıdalanýǵa berildi. Qabyldanǵan sharalardyń nátıjesinde azyq-túlik óndirisiniń kólemi ótken jyldyń qorytyndysy boıynsha 3,9 trln teńgege jetip, 8,1 paıyzǵa artty.
Bıyl da qarqyndy. Bıylǵy jyldyń qańtar–sáýir aılarynda 1,4 trln teńgeniń ónimi óndirildi. Bul ótken jyldyń sáıkes kezeńimen salystyrǵanda 14,4 paıyzǵa joǵary. Salanyń negizgi kapıtalyna eki eseden astam ınvestıtsııa tartylyp, 389 mlrd teńgeden asty. Óńdelgen ónim eksporty 3,6 mlrd AQSh dollaryna jetip, agroónerkásiptik keshenniń jalpy eksportyndaǵy úlesi 51,4 paıyzdy qurady.
Alqa otyrysynda astyqty tereń óńdeý, maı óńdeý salasyn damytý, qant ónerkásibin jetildirý, sondaı-aq sút jáne et óńdeý kásiporyndaryn jańǵyrtý máseleleri keńinen qaraldy.
Otyrys barysynda Qazaqstan un eksporttaý boıynsha álemdegi jetekshi elderdiń biri ekeni, ósimdik maıyn eksporttaıtyn iri memleketter qataryna kiretini jáne astyq pen maıly daqyldardy tereń óńdeý ónimderiniń óndirisin turaqty túrde arttyryp kele jatqany aıtyldy.
Sonymen qatar qant óndirisin damytý, jún men terini óńdeý, sút jáne et óńdeý kásiporyndaryn otandyq shıkizatpen qamtamasyz etý baǵytyndaǵy jumystar jalǵasýda.
Alqa otyrysynda aýyl sharýashylyǵy ónimderin óńdeý kórsetkishteri men ınvestıtsııalyq jobalardy iske asyrý qarqyny tómen degen óńirler ákimderi orynbasarlarynyń esepteri tyńdaldy.
Qorytyndy sózinde Aıdarbek Saparov óńdeý ónerkásibiniń turaqty damyp kele jatqanyn alǵa tarta otyryp, azyq-túlik óndirisin ulǵaıtý jáne agroónerkásiptik keshendegi óńdelgen ónim úlesin arttyrý boıynsha belgilengen kórsetkishterge qol jetkizýdi, ınvestıtsııalyq jobalardy jedel iske asyrýdy, kásiporyndardy jańǵyrtý jumystaryn jalǵastyrýdy jáne óńdeý óndiristeriniń derekqoryn ózektendirýdi tapsyrdy.
Jıynǵa mınıstrlikke qarasty uıymdardyń basshylary, oblystar men Shymkent qalasy ákimderiniń orynbasarlary, aýyl sharýashylyǵy, veterınarııa jáne balyq sharýashylyǵy salalarynyń óńirlik basqarmalarynyń ókilderi, jer resýrstaryn basqarý departamentteriniń mamandary jáne mınıstrliktiń aýmaqtyq bólimsheleriniń basshylary qatysty.
Osyǵan deıin sheteldik azyq-túlik ónimderin satyp alý shekteletini týraly jazdyq.
