Elimizdegi avtojoldardyń sapasyn baqylaý úshin 220 avtojúıe ornatylady
ASTANA. KAZINFORM – Qazaqstan joldarynda avtojoldar sapasy men kólikterdiń shamadan tys júktelýin baqylaý úshin 220 avtojúıe ornatylady. Bul týraly QR Úkimetiniń baspasóz qyzmeti habarlady.
2024 jylǵy naýryzda Atyraýda ótken Ulttyq quryltaı otyrysynda Memleket basshysy Qasym-Jomart Toqaev Úkimetke avtojoldar sapasyn jaqsartýǵa basa nazar aýdara otyryp, aýqymdy qurylys jáne jóndeý jumystaryn bastaýdy tapsyrǵan bolatyn. Atalǵan tapsyrma sheńberinde Kólik mınıstrligi Úkimet atynan qurylysty jetildirýge, joldardy paıdalaný standarttarynyń saqtalýyn qamtamasyz etýge de baǵyttalǵan sharalar keshenin ázirlep, júzege asyryp jatyr.
Basym baǵyttardyń biri – kólikti baqylaý júıesin keńeıtý. 2026 jyldyń sońyna deıin búkil el boıynsha 220-ǵa jýyq avtomattandyrylǵan ólsheý stansalaryn (AÓS) ornatý josparlanýda. Respýblıkalyq mańyzy bar avtojoldarda 126 AÓS ornatylady. Bul stansalar jergilikti tas joldarda da paıda bolady. Ornatý jumystarymen Kólik mınıstrligi jáne óńir ákimdikteri aınalysyp keledi.
AÓS foto jáne beınejazbalar túsirip, kóliktiń markasyn, memlekettik tirkeý nómirin, salmaǵy men gabarıttik parametrlerin, ostik júktemeleri men jyldamdyǵyn tirkeıdi.
Kóliktiń shamadan tys júktelýi anyqtalǵan kezde júıe avtomatty túrde fotofıksatsııa jasaıdy, sodan keıin aqparat kólik derekqorynyń aqparattyq-analıtıkalyq júıesine jiberiledi. Bul Kólik komıtetine salmaq normalarynyń asyp ketýine baılanysty quqyq buzýshylyqtar týraly habarlamalardy jedel jiberýge múmkindik beredi.
Tıisti kólik baqylaýdy qamtamasyz etý úshin avtomattandyrylǵan ólsheý stansalarynyń sanyn edáýir arttyrý josparlanýda. Elordaǵa kire beriste 9 jańa avtomattandyrylǵan stansa ornatylǵan. Elimiz boıynsha AÓS-tiń jalpy sany 50 birlikten asady. Kólik baqylaý vedomstvosy qyzmetkerleriniń aıtýynsha, bul sharalar aýyr júk kólikteriniń júrýin baqylaý máselelerin sheshý jáne kóliktik baqylaý kezinde sybaılas jemqorlyq táýekelderin azaıtý úshin josparlanǵan.
Sonymen qatar Kólik mınıstrligi jol jumystarynyń sapasyn baqylaýdyń 5 satyly júıesin engizýde, bul merdigerden tapsyrys berýshige deıingi barlyq kezeńderdi qamtıdy:
Birinshi kezeń – materıaldardyń sapasyna úzdiksiz baqylaý júrgizetin jáne atqarýshylyq-tehnıkalyq qujattamany júrgizetin merdiger uıymnyń ózi.
Ekinshi kezeń – kúndelikti jedel baqylaýdy júzege asyrady jáne jasyryn jumystar men oryndalǵan kólemderdi kýálandyratyn tehnıkalyq qadaǵalaý qyzmeti.
Úshinshi kezeń – jobalyq sheshimderdiń saqtalýyn baqylaıtyn jáne qajet bolǵan jaǵdaıda jobalaý-smetalyq qujattamaǵa ózgerister engizetin avtorlyq qadaǵalaý qyzmeti.
Tórtinshi kezeń – ýákiletti organnan jumystar men materıaldardyń sapasyn iriktep baqylaýdy júzege asyratyn Ulttyq sapa ortalyǵy.
Besinshi kezeń – jobany júzege asyrylýyna jalpy baqylaýdy, memlekettik organdarmen ózara is-qımyldy qamtamasyz etýdi, aıaqtalǵan jumystardy qabyldaýdy júzege asyratyn jáne bıýdjet qarajatynyń jumsalýyn baqylaıtyn tapsyrys berýshi.
Kóp deńgeıli tásil barlyq normatıvtik talaptyń qatań saqtalýyn qamtamasyz etýge jáne jol tóseminiń beriktigin arttyrýǵa arnalǵan.