Elimizdegi áýejaılarda arnaıy ekonomıkalyq aımaq engizilýi múmkin

Astana, Almaty, Shymkent, Aqtaý, Aqtóbe jáne Qaraǵandy áýejaılarynda arnaıy ekonomıkalyq aımaq engizý josparlanyp otyr, dep habarlaıdy Kazinform Azamattyq avıatsııa komıtetine silteme jasap. 

Kólik mınıstri Marat Qarabaev áýejaılar aýmaǵynda arnaıy ekonomıkalyq aımaqtar qurý máselesi boıynsha ákimdikter men avıatsııalyq kásiporyndardyń qatysýymen keńes ótkizdi. Qazirgi ýaqytta QR Kólik mınıstrligi Astana, Almaty, Shymkent, Aqtaý, Aqtóbe jáne Qaraǵandy áýejaılarynda arnaıy ekonomıkalyq aımaqtarengizý máselesin pysyqtap jatyr.

Sondaı-aq jergilikti atqarýshy organdarmen birlesip, erekshe ekonomıkalyq rejım qajet bolatyn basqa da óńirlik áýejaılardy anyqtaý boıynsha jumys júrgizilip jatyr. Vedomstvo júk aǵyndaryn qazaqstandyq áýejaılarǵa baǵyttaýdy jáne qaıta baǵyttaýdy yntalandyrýǵa ári tutastaı alǵanda eldiń kólik ınfraqurylymyn damytýǵa basa nazar aýdaryp otyr.

Áýejaılarda arnaıy ekonomıkalyq aımaqtar qurý – keń taralǵan halyqaralyq tájirıbe. Atap aıtqanda, Dýbaı, Sıngapýr, Shannon, Er-Rııad jáne basqa da áýe aılaqtarynda atalǵan ekonomıkalyq aımaqtar nátıjeli jumys istep jatyr.

QR Ónerkásip jáne qurylys mınıstrliginiń aqparaty boıynsha Qazaqstannyń 12 óńirinde arnaıy ekonomıkalyq aımaq bar.