Elimizdegi arnaıy ekonomıkalyq aımaqtar ınfraqurylymynyń daıyndyǵy qandaı deńgeıde

ASTANA. KAZINFORM — Premer-mınıstr Oljas Bektenov Májilis depýtattarynyń saýalyna oraı elimizdegi arnaıy ekonomıkalyq aımaqtar ınfraqurylymynyń daıyndyq deńgeıine qatysty málimettermen bólisti.

— Qazirgi ýaqytta eldiń 14 óńirinde 17 arnaıy ekonomıkalyq aımaq (AEA) jumys isteıdi, onyń úsheýi 2025 jyly qurylǵan. Barlyq AEA aýmaǵynyń jalpy aýdany shamamen 140 848,2 gektardy quraıdy. AEA ınfraqurylymyn salýǵa búkil kezeńde jumsalǵan jıyntyq shyǵystar — 427,5 mlrd teńge. AEA ınfraqurylymynyń ortasha daıyndyǵy — 53,3 paıyz, — dedi Oljas Bektenov.

Onyń málimetinshe, 17 arnaıy ekonomıkalyq aımaqtyń ishinen: 

— úsh AEA-da ınfraqurylym daıyndyǵy 100 paıyz («Innovatsııalyq tehnologııalar parki» (ITP), «Ońtústik» jáne «Horgos — Shyǵys qaqpasy»);

— toǵyz AEA-da ınfraqurylym daıyndyǵy 50-95 paıyz («Saryarqa», «Astana — Jańa qala», «Jibek Joly», «Horgos MTsPS», «Turan», «Pavlodar», «Aqtaý teńiz porty», «Ulttyq ındýstrııalyq munaı-hımııa tehnoparki» (UIMHT), «QYZYLJAR», atalǵan AEA aýmaǵynda kommýnıkatsııalar men ınjenerlik jelilerdiń negizgi bóligi qazirdiń ózinde tartylǵan);

— bes AEA-da ınfraqurylym joq nemese qurylystyń bastapqy satysynda («Alatau», «Aqtóbe», «Qorqyt Ata», «Atyraý», «Astana-Tehnopolıs»).

— Úkimet AEA-ny ınfraqurylymdyq qamtamasyz etý qajettigine únemi taldaý júrgizip turady. Óńirlik deńgeıde obektilerdiń daıyndyǵyn baqylaýdy qamtamasyz etedi. Qazirgi ýaqytta jalpy qajettilik 1 116,8 mlrd teńgeni quraıdy. Injenerlik ınfraqurylymǵa ýaqtyly qosý jáne ınvestorlarǵa ádil qoljetimdilik berý máseleleri Úkimettiń turaqty baqylaýynda, — dedi Úkimet basshysy.

Buǵan deıin Oljas Bektenov Prezıdenttiń «Alataý» ITP» AEA aýmaǵyndaǵy joǵary tehnologııalyq óndiristerdi damytý jónindegi tapsyrmalarynyń oryndalý barysyn teksergenin jazǵan edik.