Elimizdegi apta ishindegi kadrlyq taǵaıyndaýlar

Atap aıtqanda, Qostanaı oblysy ákiminiń ókimimen buǵan deıin Aýyl sharýashylyǵy vıtse-mınıstri qyzmetin atqarǵan Erbol Tasjúrekov Qostanaı oblysy ákiminiń orynbasary bolyp taǵaıyndaldy. 

Ol 1979 jyly Taraz qalasynda dúnıege kelgen. M.H. Dýlatı atyndaǵy Taraz memlekettik ýnıversıtetin; Q.A. ıAssaýı atyndaǵy Halyqaralyq Qazaq-Túrik ýnıversıtetin; Qazaqstan Respýblıkasy Prezıdentiniń janyndaǵy Memlekettik basqarý akademııasyn; Frantsııanyń Ulttyq ákimshilik mektebin támámdady.

2003-2007 jyldary «Profıl-Lux» jaýapkershiligi shekteýli seriktestiginiń dırektory boldy. 2007-2013 jyldary Astana qalasy Almaty aýdanynyń № 2 aýdandyq sotynda túrli laýazymdarda jumys istedi. 2013-2014 jyldary Qazaqstan Respýblıkasy Óńirlik damý mınıstrliginde basshylyq laýazymdardy atqardy.

2014-2016 jyldary - Qazaqstan Respýblıkasy Ulttyq ekonomıka mınıstrligi departamenti dırektorynyń orynbasary; 2016-2018 jyldary - Qazaqstan Respýblıkasy Investıtsııalar jáne damý mınıstrligi Investıtsııalar komıteti tóraǵasynyń orynbasary; 2018-2019 jyldary - Ońtústik Qazaqstan oblysy ákiminiń orynbasary; 2019-2021 jyldary – «QazAgro» ulttyq basqarýshy holdıngi» aktsıonerlik qoǵamynyń basqarýshy dırektory - Basqarma múshesi; 2023-2026 jyldary - Qazaqstan Respýblıkasynyń Aýyl sharýashylyǵy vıtse-mınıstri.

Ulytaý oblysynda balalar quqyqtaryn qorǵaý salasynda kadrlyq taǵaıyndaý boldy. Vedomstvonyń jańa basshysy bolyp bilim berý, áleýmettik sala jáne memlekettik qyzmette kópjyldyq tájirıbesi bar Zına Aqylbekova taǵaıyndaldy. 

Zına Aqylbekova 1965 jyly dúnıege kelgen. Eńbek jolyn 1988 jyly Jezqazǵan qalasyndaǵy Oqýshylar saraıynda ádisker bolyp bastaǵan. Ár jyldary ádistemelik jumystar jónindegi dırektordyń orynbasary, № 11 mekteptiń oqý isiniń meńgerýshisi qyzmetterin atqaryp, ishki saıasat pen bilim berý salalarynda eńbek etken.

2011–2015 jyldary Jezqazǵan qalasynyń bilim, dene shynyqtyrý jáne sport bólimin basqardy. Keıin jeti jyldan astam ýaqyt qala ákiminiń ishki saıasat jáne áleýmettik sala máseleleri jónindegi orynbasary qyzmetin atqardy.

Sondaı-aq Zına Aqylbekova Ulytaý oblysynyń jumyspen qamtýdy úılestirý jáne áleýmettik baǵdarlamalar basqarmasyn basqarǵan. Jańa taǵaıyndaýǵa deıin oblys ákiminiń orynbasary qyzmetinde boldy.

Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń buıryǵymen Medet Nurlanuly Nurlanov «Ertis ormany» memlekettik orman tabıǵı rezervaty» RMK bas dırektordyń mindetin atqarýshy laýazymyna bekidi.

Medet Nurlanovtyń saladaǵy jalpy jumys tájirıbesi 10 jyldan asady. Orman sharýashylyǵy júıesinde mol tájirıbesi bar, salanyń ishki tynysy men erekshelikterin tereń meńgergen bilikti maman. Óziniń eńbek jolynda kásibıligimen, uıymdastyrýshylyq qabiletimen jáne júktelgen mindetterge jaýapkershilikpen qaraýymen tanyldy.

Jańa basshyǵa rezervattyń biregeı tabıǵı keshenin saqtaý, orman qoryn qorǵaý men udaıy óndirý, sondaı-aq memlekettik ınspektorlardyń jumysyn tıimdiligin arttyrý baǵytyndaǵy mindetterdi sapaly júzege asyrý tapsyrylyp otyr

Qazaqstandyq maman Nurbol Jumasqalıev «Ertis» fýtbol klýbynyń bas bapkeri atandy. 

Qazaqstandyq fýtbol tarıhyndaǵy eń kórnekti fýtbolshylardyń biri Nurbol Járdemuly Qazaqstan chempıonaty tarıhyndaǵy eń kóp match ótkizgen (526 oıyn) jáne eń kóp gol soqqan (167 gol) rekord ıesi retinde erekshelenedi. Ol mansabynyń basym bóligin qostanaılyq «Tobyl» sapynda ótkizdi. Al 2017 jyly pavlodarlyq «Ertis» klýbynda oıyn kórsetti. 

Mansabynda Qazaqstan chempıony, Qazaqstan Kýbogy men Sýperkýbogy ıegeri, Intertoto Kýbogy jeńimpazy bolyp tabylady. Sondaı-aq Nurbol Jumasqalıev Qazaqstan ulttyq quramasy tarıhyndaǵy matchtar men goldar sany boıynsha úzdik ondyqqa kiredi.

Fýtbolshy mansabyn aıaqtaǵannan keıin ol 2018 jyldan bastap «Tobyl» klýbynda bapkerlik jáne basqarýshylyq qyzmetter atqardy. Aldymen sport dırektory laýazymynda bolsa, keıingi jyldary qostanaılyq klýbtyń bas bapkeri tizginin ustady. 

Sondaı-aq Nurbol Járdemuly Qazaqstan ulttyq jáne jastar quramalarynda bas bapkerdiń kómekshisi bolyp jumys istedi.

Aıtý kerek, Nurbol Jumasqalıevtiń «Ertistegi» jattyqtyrýshylar quramyna Danııar Muqanov jáne Oleg Nedashkovskıı kirdi. Tanymal mamandar bas bapker kómekshileri qyzmetterin atqarady.

Qazaqstan Respýblıkasynyń «Saılaý týraly» Zańyna sáıkes, Amanat partııasynyń tizimi boıynsha Almaty qalasy máslıhatynyń depýtattyq bos mandaty Dosbol Jylqybaevqa berildi. 

Ol 1984 jyly 27 qyrkúıekte Jambyl oblysy Sarysý aýdanynda dúnıege kelgen. Ál-Farabı atyndaǵy Qazaq ulttyq ýnıversıtetin «quqyqtaný» jáne «keden isi» mamandyqtary boıynsha támamdaǵan.

2020 jyldan bastap «AMANAT» partııasynyń múshesi. Buǵan deıin VII shaqyrylymdaǵy Jambyl oblystyq máslıhatynyń depýtaty retinde kásipkerlikti qoldaý, qurylys, kólik jáne turǵyn úı-kommýnaldyq sharýashylyq máseleleri jónindegi komıssııa quramynda jumys atqarǵan.