Elimizdegi alǵashqy keńirdek bıfýrkatsııasynyń otasy Shymkentte jasaldy

ASTANA. KAZINFORM — Shymkent qalalyq onkologııalyq ortalyqta elimizde alǵash ret asa kúrdeli operatsııa keńirdek bıfýrkatsııasynyń rezektsııasy sátti jasaldy. Bul týraly DSM baspasóz qyzmeti habarlady. 

Ota 37 jastaǵy naýqasqa jasalyp, dárigerler oń jáne sol jaq bronhtardy, keńirdek bıfýrkatsııasyn kesip alyp, rekonstrýktsııalyq ádispen jańa bıfýrkatsııa qalyptastyrdy.

Búgin Shymkent qalalyq densaýlyq saqtaý basqarmasynyń mindetin atqarýshy Sáýle Dúısenbaeva ortalyqta bolyp, ota jasalǵan naýqastyń jaǵdaıymen tanysty. Ol naýqaspen tildesip, medıtsına qyzmetkerlerine joǵary kásibı eńbekteri úshin alǵysyn bildirdi.

Bul operatsııa Qazaqstan onkologııasy tarıhynda alǵash ret oryndaldy. Ol joǵary tehnologııalyq ádisterdi meńgerýdi, komandalyq úılesimdilikti jáne dárigerlerdiń kásibı biliktiligin talap etedi.

Jańa ádisti tájirıbege engizý úshin Shymkent onkologııalyq ortalyǵy Reseıdiń N. N. Petrov atyndaǵy onkologııa ulttyq medıtsınalyq zertteý ortalyǵymen áriptestik ornatqan. Jergilikti mamandar turaqty túrde sheteldik jetekshi mamandardyń sheberlik sabaqtaryna qatysyp, kásibı deńgeıin arttyryp keledi.

Bul shymkenttik dárigerlerdiń kásibı ósýi men zamanaýı medıtsınalyq tehnologııalardy ıgerýdiń naqty nátıjesi. 

Aıta ketelik kardıologııa jáne ishki aýrýlar ǴZI bazasynda jańa endoskopııalyq oqý ortalyǵy jumys isteı bastady.