Elimizdegi alǵashqy áýe taksıi testilik rejımde ushyryldy

«Almaty» - «Óskemen» tasjolynyń boıynda, qazirgi Alataý qalasynyń aýmaǵynda salynǵan ushý alańynda eVTOL áýe apparatynyń jumysy tanystyryldy. Bul kólik túrin tiginen ushyp-qonatyn elektrli áýe apparattaryn óndirýmen aınalysatyn AutoFlight kompanııasy usyndy.

Qytaılyq kompanııanyń birinshi vıtse-prezıdenti Kallen Shıdiń aıtýynsha, bul áýe kóliginiń maksımaldy ushý salmaǵy shamamen 2000 keli bolady. Bir ret qýattalǵan soń, ushý ýaqyty 1 saǵatqa, al ushý qashyqtyǵy 250 shaqyrymǵa deıin jetedi. Jalpy áýe kóliginiń qanat uzyndyǵy - 15 metr, uzyndyǵy - 11 metr jáne bıiktigi - 3 metr.

- Bul — tolyqtaı elektr qýatymen jumys isteıtin, tiginen ushyp-qonatyn áýe kemesi. Ol 100% elektrli bolǵandyqtan, kómirtegi qaldyqtaryn múldem shyǵarmaıdy, ıaǵnı óte ekologııalyq taza. Qorshaǵan ortaǵa eshqandaı zııany joq, - dedi ol.

Sonymen qatar AutoFlight kompanııasynyń ókili áýe taksıi tiginen ushyp-qonatyndyqtan, oǵan arnaıy ushý-qoný jolaǵy ne úlken áýejaı qajet emes ekenin atap ótti. Aıtýynsha, 30 metrlik shaǵyn alań bul kólik túrine jetkilikti. Sonyń arqasynda qala ishi men syrtynda kóptegen vertıporttar (tikushaq beketteri) ashýǵa bolady.

Odan bólek eVTOL apparattarynyń túrine qaraı áýe arqyly júk tasymaldaýǵa, tótenshe jaǵdaılar kezinde shuǵyl áreket etýge jáne órt sóndirý jumystaryna qoldanýǵa bolady. Áýe kólikterine ereksheligine qaraı 1 ushqysh pen 5 jolaýshy, 2 ushqysh pen 4 jolaýshy sııady. Sondaı-aq ushqyshsyz ushatyn túrleri de bar.

- Al eń bastysy — bolashaqta qalaaralyq jolaýshylar men júk tasymaly úshin taptyrmas kólikke aınalady. Almaty men Qazaqstan óziniń taýlarymen jáne áýeden kórkem tabıǵatymen tanymal. Sondyqtan bul apparatty jolaýshylar men týrısterdi taý bókterinen taý-shańǵysy kýrorttarynyń eń bıik shyńdaryna deıin jetkizý úshin de paıdalanýǵa ábden bolady, - dedi Kallen Shı.

Al Alatau Advanced Air Group kompanııasynyń jobalyq menedjeri Danııar Tileýlın Qazaqstan aýmaǵynda bul joba jeke ınvestıtsııalyq qarajat esebinen júzege asyrylyp jatqanyn aıtty.

Eske salaıyq, 2025 jyldyń aqpan aıynda Almaty men Alataý qalasynyń arasynda sýtegimen júretin tikushaq-taksı paıda bolýy múmkin ekenin habarlandy.

Keıin Alataý qalasynda ornalasqan «Oiz Tulip» ındýstrııaldyq aımaǵynda áýe taksıi jobasyn iske asyrý maqsatynda ushý apparattaryn ushyrý úshin testilik ortalyq ashylǵanyn jazǵan edik.

Búgin Úkimet otyrysynda Kólik mınıstri Nurlan Saýranbaev qalalyq aerotaksıdi (Urban Air Mobility) damytý úshin «Allıýr» jáne «Alataý Edvansd Grýpp» kompanııalary testilik pılotsyz ushý apparattaryn satyp alyp jatqanyn aıtty.

Al Kólik vıtse-mınıstri Talǵat Lastaev aerotaksıdiń tehnıkalyq sıpattamalary týraly aıtyp berdi.