Elimizdegi alǵashqy ári eń uzyn avtokólik tonneli paıdalanýǵa berildi
TÚRKІSTAN. KAZINFORM – Bul qurylys – elimizdegi avtomobıl joldary salasyndaǵy biregeı joba. Túrkistan oblysy, Shaqpaq Baba asýyndaǵy eki jolaqty tonneldiń uzyndyǵy – 840 metr. Eni – 11 metr, bıiktigi – 8 metr.
Búgin Túrkistan oblysy Túlkibas aýdany Shaqpaq baba aýylynyń mańynda ornalasqan halyqaralyq mańyzy bar avtojol tonneli el ıgiligine paıdalanýǵa berildi. Saltanatty is-sharaǵa QR Kólik vıtse-mınıstri Sátjan Ablalıev, Túrkistan oblysy ákiminiń birinshi orynbasary Zulpyhar Joldasov, Jambyl oblysy ákimniń orynbasary Qanatbek Mádibek, sala mamandary men eki oblystyń aqsaqaldary qatysty.
Mańyzdy nysannyń ashylý saltanatynda alǵysóz alǵan Kólik vıtse-mınıstri Sátjan Ablalıev turǵyndardy qýanyshymen quttyqtap, salada atqarylyp jatqan jumystardy aıtyp ótti.
«Bul – Qazaqstannyń kólik ınfraqurylymy úshin mańyzdy oqıǵa. Elimizdegi alǵashqy tonnel. Búgin ashylǵannan keıin negizgi kólik aǵyny Shaqpaq Baba eldi-mekeniniń aınalma jolyna baǵyttaldy. Bul eldi mekenniń ishindegi jol qaýipsizdigin arttyrýǵa septigin tıgizbek. Sonymen qatar nysan qysta júrgizýshilerdiń Shaqpaq baba asýynda qar qursaýynda qalyp qoımaýyna múmkindik beredi», – degen Sátjan Ablalıev jol paıdalanýshylaryna jaıly jáne qaýipsiz jol tiledi.
Basqosýda Túrkistan oblysy ákiminiń birinshi orynbasary Zulpyhar Joldasov quttyqtaý sóz alyp, nysannyń mańyzyna toqtaldy.
«Búgin biz elimizdegi eń mańyzdy ári qurylysy kúrdeli nysandy tapsyrǵaly turmyz. Túrkistan oblysy men Jambyl oblysyn baılanystyratyn avtojol tonneli respýblıkadaǵy kólemi boıynsha eń uzyn tonnel ekenin atap ótkim keledi. Memleket basshysy Qasym-Jomart Kemeluly Qazaqstan halqyna Joldaýynda elimiz Azııa men Eýropany qosatyn álemdik mańyzy bar kólik-tasymal torabyna aınalý qajettigin atap ótti. Búgingi tańda bul baǵyttaǵy jumystar artqarylyp jatyr. Bul nysandy paıdalanýǵa berý arqyly jol qozǵalysynyń qaýipsizdigi qamtamasyz etiledi jáne óńirdegi jolaýshylar aǵyny men júk aınalymy artyp, týrızmniń damýyna áserin tıgizedi», – dedi Zulpyhar Joldasov.
Qaýipsizdikti qamtamasyz etý maqsatynda tonneldiń eki jaǵynda jaryqtandyrý, jeldetý, dabyl berý jáne baǵdarshamdardy retteý úderisterin basqaratyn dıspetcherlik pýnktter qarastyrylǵan. Sonymen qatar naqty ýaqyt rejıminde tonneldi baqylaýǵa múmkindik beretin beınebaqylaý jáne órtten qorǵaý júıeleri ornatylǵan. Tonneldiń janynda júrgizýshiler men jolaýshylar úshin jol jóndeý pýnkti, janarmaı quıý beketi, tikushaq alańdary jáne saýda aımaqtary qarastyrylǵan.
Avtojol tonneliniń ashylýy qarsańynda 100 adam jáne 15 birlik arnaıy tehnıka jumyldyryp, arnaıy oqý-jattyǵýlary ótkendigin atap ótken jón. Arnaıy jattyǵýlar sheńberinde tonneldiń qaýipsizdik júıeleri, sonyń ishinde jeldetý jáne órt sóndirý jumystary synaldy. Sondaı-aq tótenshe jaǵdaı kezinde kólik quraldaryn jedel súıreý jáne jol-paıdalaný tehnıkasynyń qozǵalysyn uıymdastyrý boıynsha is-áreketter pysyqtaldy.
Іs-shara barysynda Kólik vıtse-mınıstri Ablalıev Sátjan osy salanyń damýyna eleýli úles qosyp, aıanbaı eńbek etip júrgen bir top azamatqa tósbelgi taǵyp, Alǵys hattarmen marapattady. Jol qozǵalysyna nusqaýlyq berilgennen keıin tonnelden avtosherý júrip ótti.
Aıta keteıik, oblysta 2024 jyly avtomobıl joldary salasyn damytýǵa respýblıkalyq jáne oblystyq bıýdjetten 41,4 mlrd teńge bólinip, qurylys-jóndeý jumystarymen jalpy 1061,3 shaqyrym jol men kósheler qamtyldy. Jyl qorytyndysymen 559,6 shaqyrym jol paıdalanýǵa beriledi dep josparlanǵan.
