Elimizdegi 677 bilim berý uıymynda sanıtarlyq-gıgıenalyq talaptar saqtalmaǵan

ASTANA. KAZINFORM - Úkimette Premer-mınıstrdiń orynbasary Ermek Kósherbaevtyń tóraǵalyǵymen bilim berý mekemelerinde balalardyń sapaly jáne qaýipsiz tamaqtanýyn qamtamasyz etý máselelerine arnalǵan keńes ótti. Bul týraly QR Úkimetiniń baspasóz qyzmeti habarlady. 

Keńes barysynda qarjylandyrý, sanıtarlyq-gıgıenalyq normalardy saqtaý, tamaq ónimderiniń sapasyn baqylaý, sondaı-aq ony tasymaldaý sharttary máselelerimen qatar mektep jáne mektepke deıingi tamaqtandyrý júıesiniń jumys isteýiniń negizgi aspektileri qaraldy. 

Oqý-aǵartý mınıstri Ǵanı Beısembaev mektepter men balabaqshalardaǵy tamaqtandyrý júıesiniń qazirgi jaǵdaıy týraly aqparatpen bólisti. Vedomstvo basshysynyń sózinshe, búginde 1,8 mln oqýshy tegin tamaqpen qamtylǵan. Ol úshin 2024 jyly respýblıkalyq bıýdjetten 205 mlrd teńge bólindi. 2025 jyldan bastap bilim berý uıymdarynda tamaqtanýdyń jańa standarttary men Dúnıejúzilik densaýlyq saqtaý uıymynyń (DDSU) usynystaryn eskere otyryp ázirlengen tıptik as máziri engiziledi.

Monıtorıng nátıjesinde 677 bilim berý uıymynda sanıtarlyq-gıgıenalyq talaptardyń buzylýy deregi anyqtaldy. Mundaı faktiler balalardyń densaýlyǵyna tikeleı qaýip tóndiretini alańdaýshylyq týdyrady. Sondyqtan jedel áreket etýdi qajet etedi. 

Premer-mınıstrdiń orynbasary Ermek Kósherbaev mektep oqýshylaryn sapaly jáne qaýipsiz tamaqtandyrýmen qamtamasyz etý — memlekettik áleýmettik saıasattyń basym mindetteriniń biri ekenin, sondaı-aq sanıtarlyq normalardy buzýǵa jol berilmeıtinin jetkizip, ónimniń sapasyn qatań baqylap qana qoımaı, olardy saqtaý jáne daıyndaý sharttaryna muqııat qaraý qajettigin de atap ótti. 

— Gıgıenalyq talaptardy saqtamaýmen baılanysty kez kelgen táýekelderdi joıý mańyzdy. Biz monıtorıngtiń zamanaýı sandyq tehnologııalaryn engizýge, satyp alý rásimderiniń ashyqtyǵyn qamtamasyz etýge jáne sapasyz qyzmet kórsetken jetkizýshiler úshin qarastyrylǵan jaýapkershilikti kúsheıtýge mindettimiz, - dedi Ermek Kósherbaev.  

Mektep jáne mektepke deıingi tamaqtandyrý júıesiniń tıimdiligin arttyrý maqsatynda beıindi memlekettik organdarǵa mynadaı tapsyrmalar berildi:

• tsıfrlyq sheshimder men monıtorıng júıesin memlekettik derekter bazasymen ıntegratsııalaýdy engizý mehanızmin ázirleý;

• bilim berý uıymdarynda azyq-túlikti saqtaý jáne tasymaldaýdy baqylaýdy kúsheıtý;

• qosymsha ákimshilik jáne vedomstvolyq sharalardy ázirleý, onyń ishinde jospardan tys tekserýler júrgizý jáne jetkizýshilerdiń sharttyq jáne sanıtarlyq mindettemelerdi buzǵany úshin jaýapkershiligin arttyrý.

Densaýlyq saqtaý mınıstrligi men Oqý-aǵartý mınıstrliginiń ókilderi balalardyń tamaqtaný salasyn retteıtin normatıvtik-quqyqtyq bazany jańartý, sondaı-aq buzýshylyqtardy baqylaý men aldyn alýdyń júıeli tetikterin engizý boıynsha usynystaryn jetkizdi.

Keńes nátıjesinde Premer-mınıstrdiń orynbasary anyqtalǵan buzýshylyqtarǵa der kezinde den qoıý úshin vedomstvoaralyq, onyń ishinde quqyq qorǵaý organdarymen ózara is-qımyldy kúsheıtý boıynsha qosymsha keshendi sharalar ázirleýdi tapsyrdy. Tamaqtandyrý qyzmetterin uıymdastyrýǵa tartylǵan personaldyń biliktiligin arttyrý, barlyq deńgeıdegi úrdisterge turaqty monıtorıng júrgizý qajettiligine nazar aýdarylady.

Úkimet bilim berý uıymdarynda zamanaýı sapa, qaýipsizdik jáne ashyqtyq standarttaryna sáıkestigin qamtamasyz ete otyryp, tamaqtandyrýdy uıymdastyrý júıesin jetildirý boıynsha jumysty jalǵastyrady. Tsıfrlyq sheshimderdi engizý, baqylaýdy arttyrý jáne qoǵamnyń belsendi qatysýy táýekelderdi barynsha azaıtýǵa, óskeleń urpaqtyń densaýlyǵy men ál-aýqatyn qorǵaýǵa baǵyttalǵan júıeniń turaqty jumys isteýine kómektesedi.