Elimizdegi 3 mln Android telefonynda jańa qutqarý júıesi jumys isteıdi
ASTANA. KAZINFORM — Astanalyq qutqarýshylar qıyn jaǵdaıǵa tap bolǵan azamattyń naqty ornyn avtomatty túrde anyqtaı alady. Android jáne iOS qurylǵysy bar azamat 112 nómirine qońyraý shalǵan sátte onyń koordınattary birden operatordyń ekranyna shyǵady.
Bul Advanced Mobile Location halyqaralyq júıesi arqyly júzege asyp otyr.
— Tótenshe jaǵdaıǵa tap bolyp, bizge qońyraý shalǵan azamattyń qurylǵysy onyń naqty ornalasqan ornyn avtomatty túrde anyqtap, koordınattardy operatorǵa jiberedi. Júıe bir mezette eń jaqyn ornalasqan qutqarý nemese jedel kómek ekıpajyn anyqtap, operatorǵa usynady. Sonyń arqasynda mamandar burynǵyǵa qaraǵanda áldeqaıda jedel áreket ete alady. Al eger qurylǵyda ınternet bolmasa, AML júıesi koordınattardy SMS arqyly jiberedi, — deıdi IT-Space kompanııasynyń bas dırektory Nurjan Nurlybaev Kazinform tilshisine bergen suhbatynda.
Ázirge júıe elimiz boıynsha 3 mln Android telefonynda jumys istep tur. Al el boıynsha jalpy 95% iOS qurylǵysynda synaq rejımimen qosylǵan. Mamandar jyl sońyna deıin Qazaqstandaǵy barlyq smartfonǵa Advanced Mobile Location júıesin engizýdi josparlap otyr.
— Eger adam qońyraý shalyp, baılanysqa shyǵa almasa, operator ol adamǵa avtomatty túrde qaıta qońyraý shala alady. Osylaısha bizben baılanysa almaǵan kóptegen tótenshe qońyraýǵa qaıta habarlasamyz. Júıe avtomatty túrde qaı bólimshe men qaı aýmaqta ornalasqanyn, sondaı-aq qandaı kúshter men quraldar qajet ekenin kórsetedi. Mysaly, eger obekt bolsa, júıe birden onyń órt qaýpi bar ekenin anyqtaıdy, qandaı materıaldar saqtalǵanyn esepke alady jáne sol boıynsha qalaı áreket etýi kerek ekenin belgileıdi. Buryn bunyń bári qolmen júrgiziletin, sondyqtan aqparatty berý kezinde 5-10 mınýtqa deıin ýaqyt joǵalatyn. Al bizdiń maqsatymyz — adam faktoryn barynsha azaıtý, — deıdi spıker.
Eske sala keteıik, budan buryn Qazaqstanda biregeı jedel kómek jelisi engiziletini anyqtaldy.