Elimizdegi 2 mektepke halyqaralyq mártebe berilmek

ASTANA. KAZINFORM – Elimizdegi 2 mektepke halyqaralyq mártebe berilmek. Úkimettiń tıisti qaýly jobasy ashyq normatıvtik-quqyqtyq aktiler portalynda jarııalandy.

«Oqý-aǵartý mınıstrligi komıssııa otyrysynyń sheshimi negizinde «Shkola 21 veka» JShS men «CA GARDEN SCHOOLS» JShS bilim berý uıymdaryna «Keıbir bilim berý uıymdaryna Halyqaralyq mektep mártebesin berý týraly» Qazaqstan Respýblıkasy Úkimet qaýlysynyń jobasyn ázirledi. Joba «Bilim týraly» Qazaqstan Respýblıkasy Zańynyń 65-babynyń 4-tarmaǵyna sáıkes ázirlendi jáne «Shkola 21 veka» jaýapkershiligi shekteýli seriktestigi men «CA GARDEN SCHOOLS» jaýapkershiligi shekteýli seriktestigine Halyqaralyq mektep mártebesin berýdi kózdeıdi», - dep atap ótedi Oqý-aǵartý mınıstrligi.

Vedomstvo málimetinshe, atalǵan bilim berý uıymdary Halyqaralyq mektep mártebesin berý qaǵıdalarynda belgilengen Halyqaralyq mektep mártebesin berý krıterıılerine sáıkes keledi.

Aıta keteıik, Oqý-aǵartý mınıstrligi 2024-2025 oqý jylyna arnalǵan jańa qabyldaýdy eskere otyryp, jekemenshik mektepterde memlekettik tapsyrysty ornalastyrýǵa qosymsha qajet somany aıqyndaǵan edi.

Memlekettik bilim berý tapsyrysy 677 jekemenshik mektepte 251,3 myń oqýshyny qamtyp, 2024 jyly respýblıkalyq bıýdjetten 133,9 mlrd teńge kóleminde qarajat bólindi.