Elimizdegi 16 sanatorıı sý tasqynynan zardap shekkenderdi tegin qabyldaıdy
ASTANA. KAZINFORM – Kýrortologııa jáne medıtsınalyq ońaltý ǵylymı-zertteý ınstıtýty sý tasqynynan zardap shekkenderdi tegin qabyldaıtyn sanatorııler bóldi. Bul týraly QR Densaýlyq saqtaý mınıstrliginiń resmı ókili Áıgerim Orazalıeva aıtyp berdi.
«Densaýlyq saqtaý mınıstrligi sý tasqynynan zardap shekkenderge kómek kórsetýdi uıymdastyrý jumysyn jalǵastyrýda. Kýrortologııa jáne medıtsınalyq ońaltý ǵylymı-zertteý ınstıtýtynyń qatysýymen zardap shekkenderdi tegin qabyldaıtyn 16 sanatorıılik-kýrorttyq uıym aıqyndaldy», - dedi spıker Respýblıkalyq aqparattyq shtabta ótken brıfıngide.
Spıkerdiń aıtýynsha, bul nysandar bir mezgilde 190 adamdy qabyldaı alady, ońaltý kýrsy 10 kúnnen 14 kúnge deıin bolady. Bul zardap shekkenderdi múmkindiginshe sanatorıılik emdeýmen qamtýǵa múmkindik beredi.
Tegin sanatorıılerdiń 12-si Túrkistan oblysynda ornalasqan. Sondaı-aq, zardap shekkenderdi qabyldaýǵa daıyndyq týraly Býrabaı, Semeı, Almaty jáne Aqtóbe oblystarynyń Alǵa kentindegi sanatorııler málimdedi.
Kýrortologııa jáne medıtsınalyq ońaltý ǴZI jergilikti atqarýshy organdarǵa sanatorıılerde dereý ornalastyrý qajet adamdardyń tizimin usyný qajettigin aıtyp otyr.
