Elimizdegi 100 úzdik kolledj stýdenti anyqtalady

ASTANA. KAZINFORM – Elimizde «Qazaqstan Respýblıkasy kolledjderiniń úzdik 100 stýdenti» respýblıkalyq konkýrsy bastaldy. Bul týraly QR Oqý-aǵartý mınıstrliginiń baspasóz qyzmeti habarlady. 

Aýqymdy joba bilimimen, kásibı sheberligimen jáne qoǵamdyq belsendiligimen daralanǵan stýdent jastardy anyqtap, olardyń jetistigin respýblıka kóleminde keńinen nasıhattaý maqsatynda uıymdastyrylyp jatyr.

Konkýrs jumysshy mamandyqtarynyń bedelin arttyrýǵa, tehnıkalyq jáne kásiptik bilim berý júıesiniń ımıdjin nyǵaıtýǵa, jastardyń kóshbasshylyq áleýetin damytýǵa jáne olardyń kásibı ósýine naqty múmkindik jasaýǵa baǵyttalǵan.

Baıqaýǵa elimizdiń barlyq óńirindegi kolledj stýdentteri qatysa alady. Atap aıtqanda, WorldSkills chempıonattary men kásibı sheberlik baıqaýlarynyń jeńimpazdary men qatysýshylary, stýdenttik ózin-ózi basqarý uıymdarynyń jáne volonterlik qozǵalystardyń kóshbasshylary, ınnovatsııalyq ıdeıalar men startap-jobalar avtorlary, ǵylymı konferentsııalar men olımpıadalardyń, sporttyq jarystardyń jeńimpazdary, sondaı-aq shyǵarmashylyq ujymdardyń belsendi músheleri úmitker bola alady. Keıingi úsh jyl ishinde osy baıqaýdyń jeńimpazy atanǵan stýdentter qaıta qatysa almaıdy. 

Konkýrs úsh kezeńnen turady. Birinshi kezeń – kolledjishilik irikteý. Ár bilim berý uıymy 5 kandıdattan artyq usyna almaıdy. Bul kezeńde úmitkerlerdiń oqý jetistikteri, kásibı tabystary jáne qoǵamdyq belsendiligi saralanady.

Ekinshi kezeń óńirlik deńgeıde ótedi. Oblystar men respýblıkalyq mańyzy bar qalalardan 10 úzdik úmitker iriktelip, olardyń jetistikteri keshendi baǵalaýdan ótedi. Úshinshi kezeńde respýblıkalyq fınal qorytyndylanady. Qorytyndy irikteý «TOP-100 STUDENTS» ınternet-resýrsynda ótkizilip, eldiń 100 úzdik kolledj stýdenti aıqyndalady.

Budan buryn habarlaǵanymyzdaı, Qazaqstanda 88 elden kelgen 35 myńnan astam sheteldik stýdent joǵary bilim alyp jatyr.