Elimizde júz adamǵa donorlyq júrek qoıyldy – mınıstr

ASTANA. KAZINFORM – Alǵash elimizde júrek transplantatsııasy 2012 jyly 38 jastaǵy patsıentke jasaldy. Búginde júz adamnyń júregi aýystyryldy.

- Búgin Qazaqstan medıtsınasy úshin eń mańyzdy kún. Táýelsizdik alǵaly medıtsına salasynyń eń bıik shyńy transplantatsııa deńgeıi dep aıtýǵa bolady. Sondyqtan elimizde júzinshi transplantatsııasy jasalǵany shyn máninde tarıhı sát. Búgin is-sharanyń maqsaty – elimizdiń medıtsına salasyndaǵy osy jetistigin aıtý, bul jolda birneshe jyl boıy medıtsına salasynyń mamandary eńbek etti. Eń alǵash elimizde júrek transplantatsııasy 2012 jyly 38 jastaǵy patsıentke jasaldy. Jańa júrek adamdarǵa jańa ómir berdi, bul otandyq medıtsınanyń jetken jetistigi. Adamı kapıtaldyń damýyna, onyń ishinde medıtsına salasy Prezıdenttiń jiti nazarynda, - dedi Densaýlyq saqtaý mınıstri Aqmaral Álnazarova elordada «Júrektiń jańa soǵysy» degen uranmen ótken «Qazaqstandaǵy 100-shi júrek transplantatsııasy» forýmynda. 

Mınıstrdiń málimdeýinshe, sońǵy jyldary medıtsına salasyna bólinetin qarjy kólemi birneshe ese artty. 

- Elimizde jasalyp jatqan otalardy Ortalyq Azııa jáne TMD elderi arasynda jetekshi orynda dep aıtýǵa bolady, - deıdi vedomstvo basshysy. 

Aıta ketsek, búgin elordada «Qazaqstandaǵy 100-shi júrek transplantatsııasy» forýmy ótti. Atalǵan is-shara elimizde júzinshi ret júrek aýystyrý otasyna oraı uıymdastyryldy, oǵan Densaýlyq saqtaý mınıstri Aqmaral Álnazarova bastaǵan sala mamandary men óńirlik vedomstvolardyń ókilderi qatysty. 

Forým sońynda aǵza transplantatsııasy salasyna eńbegi sińgen jáne erekshe kózge túsken jandar marapattaldy. 

Atalǵan is-sharada elimizge belgili dáriger ıÝrıı Pıa transplantatsııa tek medıtsına máselesi emes, qoǵamnyń ortaq problemasy ekenin málim etti.

Eske sala keteıik, byltyr elimizde transplantatsııa jasalatyn organ arnaıy qurylǵyda saqtalatyny týraly jazǵan edik. 
Qazir atalǵan apparat synaqtan ótip jatyr, bıyl sáýirden keıin paıdalanýǵa berilýi múmkin.