Elimizde júrgizýshilerdi daıarlaıtyn uıymdardy baqylaý kúsheıedi
ASTANA. KAZINFORM — Memleket basshysy «Qazaqstan Respýblıkasynyń keıbir zańnamalyq aktilerine tsıfrlandyrý, derbes derekterdi qorǵaý, jol júrisi jáne kóliktegi ozyq tehnologııalardy retteý máseleleri boıynsha ózgerister men tolyqtyrýlar engizý týraly» Zańǵa qol qoıdy.
Jol júrisi máseleleri boıynsha engizilgen ózgerister jol júrisi qaýipsizdigin arttyrýǵa, júrgizýshilerdi daıarlaýdyń sapaly júıesin qalyptastyrýǵa jáne osy saladaǵy memlekettik baqylaýdy kúsheıtýge baǵyttalǵan.
Osy maqsatta jol júrisi qaýipsizdigin qamtamasyz etý salasyndaǵy ýákiletti organǵa (ІІM) júrgizýshilerdi daıarlaý qyzmetin júzege asyratyn oqý uıymdaryna ruqsat berý jáne olardyń qyzmetine keıinnen baqylaý júrgizý jónindegi ókilettikter beriledi.
Jyl saıyn 140 myńnan astam azamat alǵash ret júrgizýshi kýáligin alady. Qazirgi ýaqytta júrgizýshilerdi daıarlaýmen 819 oqý uıymy aınalysady. Taǵy bir ózgeriske sáıkes, elektr samokattarynyń trotýarlarmen jáne jaıaý júrginshiler joldarymen júrýine tyıym salynady. Sebebi olar jaıaý júrginshilerdiń, ásirese balalardyń qaýipsizdigine naqty qaýip tóndiredi.
2025 jyly elimizde elektr samokattary júrgizýshileriniń kinásinen 139 jol-kólik oqıǵasy tirkelip, onyń saldarynan 149 adam jaraqat alǵan.
Túzetýlermen «Jol júrisi týraly» Zańnan eldimekenderde qozǵaltqyshy jumys istep turǵan kólik quralyn turaqqa qoıýǵa tyıym salý normasy alyp tastalady, avtomatty túrde quqyq buzýshylyqtardy tirkeıtin kameralardy qoldaný aıasy keńeıtiledi, sondaı-aq elektromobılder úshin arnaıy memlekettik tirkeý nómirlik belgileri engiziledi.
Barlyq ózgeris joldardaǵy qaýipsizdikti qamtamasyz etýge jáne jol júrisine qatysýshylar úshin qolaıly jaǵdaı jasaýǵa baǵyttalǵan.
