Elimizde júrek aýrýlaryna jasalatyn kúrdeli operatsııalar qoljetimdi
ASTANA. KAZINFORM – Almatyda Qazaqstannyń, Qyrǵyzstannyń, Ózbekstannyń, Tájikstannyń, Ázerbaıjannyń, Eýropa, Azııa jáne Qytaıdyń jetekshi mamandarynyń qatysýymen Qazaqstannyń ınterventsııalyq kardıologtary jáne endovaskýlıarlyq hırýrgter qoǵamynyń XIV konferentsııasy ótip jatyr.
Densaýlyq saqtaý mınıstrligi málimetinshe, búginde ınterventsııalyq kardıologııa – medıtsınadaǵy eń joǵary tehnologııalyq baǵyttardyń biri. Zamanaýı halyqaralyq standarttar men hattamalardy engizý Qazaqstanda asa kúrdeli ınterventsııalar men operatsııalardy oryndaýǵa múmkindik berip, olardy patsıentter úshin tegin medıtsınalyq kómek sheńberinde qoljetimdi etedi.
Konferentsııanyń ereksheligi – Almaty qalalyq kardıologııalyq ortalyǵynyń operatsııalyq bólimderinen júrgizilip jatqan operatsııalardyń tikeleı kórsetilimi boldy. Qatysýshylar operatsııa barysyn naqty ýaqyt rejıminde baqylap, pikirtalasqa qatysady jáne mamandarmen birlesip emdeýdiń ońtaıly taktıkasyn tańdaýdy talqylaıdy.
Búginde Almatyda zamanaýı endovaskýlıarlyq aralasýlar men ashyq júrekke jasalatyn operatsııalardyń barlyq túri, onyń ishinde júrekti transplantattaý, LVAD ımplantattaý, MitraClip, tamyrishilik lıtotrıpsııa jáne kúrdeli koronarlyq aralasýlar qoljetimdi.
2026 jyldyń alty aıynda Almatyda 7 454 koronarografııa jáne 3 698 koronarlyq aralasý jasaldy, al kardıohırýrgııalyq operatsııalardyń kólemi 68%-ǵa ósti.
2025 jyldyń qorytyndysy boıynsha elimizde ashyq júrekke 13 106 operatsııa jasaldy. Hırýrgııalyq aralasýlardyń eń úlken úlesin aortokoronarlyq shýnttaý operatsııalary – 46,1%, júre paıda bolǵan júrek kemistikterine jasalatyn operatsııalar – 22,7%, týa bitken júrek kemistikterine jasalatyn operatsııalar – 13,1% boldy.
Elimizde turaqty oń dınamıka baıqalady: sońǵy bes jylda qanaınalym júıesi aýrýlarymen syrqattanýshylyq 15%-ǵa, al osy aýrýlardan bolatyn ólim 35,1%-ǵa tómendedi. 2026 jyldyń alǵashqy bes aıynyń qorytyndysy boıynsha syrqattanýshylyqtyń:
* júrektiń ıshemııalyq aýrýy boıynsha – 10,1%-ǵa;
* jiti mıokard ınfarktisi boıynsha – 5,7%-ǵa;
* mıdyń qanaınalymynyń jiti buzylystary (ınsýltter) boıynsha – 6,1%-ǵa tómendeý úrdisi saqtalyp otyr.
Qol jetkizilgen nátıjeler ınsýlt jáne kardıologııalyq ortalyqtar jelisin damytý, joǵary tehnologııalyq medıtsınalyq kómek kólemin keńeıtý, zamanaýı klınıkalyq hattamalardy engizý, jedel medıtsınalyq járdem qyzmetin jetildirý, profılaktıkalyq tekserýlerdi keńeıtý jáne júrek-qantamyr aýrýlary bar patsıentterdi dári-dármekpen qamtamasyz etýdiń qoljetimdiligin arttyrý nátıjesinde múmkin boldy.
Dúnıejúzilik densaýlyq saqtaý uıymynyń málimetinshe, qanaınalym júıesi aýrýlary álemdegi ólimniń negizgi sebebi bolyp qala beredi. Jyl saıyn bul aýrýlar shamamen 19,8 mln adamnyń ómirin qııady, bul barlyq ólim jaǵdaılarynyń shamamen 32%-y.
Elimizde jol apaty, qaterli isik jáne júrek aýrýlarynan bolatyn ólim-jitim azaıǵanyn jazǵan edik.
Elde alǵash ret júrek tamyrlaryna bıosińiriletin karkas ornatyldy.
