Elimizde jumyssyzdar VR-tehnologııalary negizinde oqytylmaq

ASTANA. KAZINFORM – Bıyl jumyssyzdar VR-tehnologııalary negizinde oqytylady. Bul jaıynda Senat depýtattarynyń saýalyna Premer-Mınıstr Oljas Bektenovtiń jaýabynda  aıtylǵan.

- 2025 jyly jumyssyzdardy VR-tehnologııalary (jumyssyz azamattarǵa praktıkalyq daǵdylaryn shyńdaýǵa múmkindik beretin arnaıy jabdyqtalǵan kabınetter) negizinde oqytý boıynsha pılottyq joba josparlanǵan. Mansap ortalyqtarynda (Qonaev, Óskemen, Túrkistan, Astana jáne Shymkent qalalary) oqytýdy uıymdastyrý úshin 5 VR-kýrsy («Eńbek qaýipsizdigi jáne qorǵaý negizderi», «Dánekerleý isiniń negizderi», «Slesarlyq istiń negizderi», «Tokarlyq istiń negizderi», «Kondıterlik istiń negizderi») satyp alynyp jatyr, - dedi Úkimet basshysy jaýabynda.

Sonymen qatar ol «Jobalardyń ınnovatsııalyq navıgatory» tsıfrlyq platformasy engizilgenin atap ótedi.

- Ol memlekettik ınvestıtsııalardyń tıimdiligin arttyrý, ınvestıtsııalyq jobalardy keshendi monıtorıngteý, merdigerler qyzmetin baqylaý men jumys oryndaryn qurý kórsetkishterin baǵalaýǵa arnalǵan, - dedi Oljas Bektenov.

Aıta keteıik, jaqynda Májilis jumyssyzdardyń Mindetti áleýmetti-medıtsınalyq saqtandyrý aıasynda emdelýine múmkindik beretin jobasyn qaraýyna alǵan bolatyn.